Երեկ ԱԺ նիստում Կառավարության կառուցվածքի փոփոխության մասին նախագծի քննարկման ժամանակ լեզվակռիվ եղավ «Լուսավոր Հայաստան» խմբակցության անդամների եւ «Իմ քայլից» Մխիթար Հայրապետյանի միջեւ: Վեճից հետո Մխիթար Հայրապետյանը գնացել է Էդմոն Մարուքյանի աշխատասենյակ:
Այսօր լրագրողների հետ զրույցում Մարուքյանը պարզաբանեց, թե ինչ է եղել. «Ռազբորկա չի եղել, դահլիճից դուրս ենք եկել, խոսել ենք, որ տարընթերցումներ չլինեն, որովհետեւ կողմերը իրար սխալ էին հասկացել: Գեւորգ Գորգիսյանը չէր ընդհատել մեծ հաշվով, ուղղակի տեղից միտք էր ասել, որ իրեն չէր վերաբերում, մեզ էր վերաբերում»:
Մենք ճշտեցինք՝ «դո՞ւ ով ես» արտահայտությունը Մխիթար Հայրապետյանի՞ն չէր վերաբերում՝ նա պատասխանեց. «Դա ասվել է, բայց կռիվը ինչից սկսվեց…»:
Հարցին՝ հաշտեցում եղա՞վ ի վերջո՝ նա պատասխանեց. «Հա, ոչ կռվել էինք, ոչ էլ հաշտվել: Որեւէ մեկը չի կարող մեզ հետ ռազբորկա անել, որեւէ մեկը չի կարող մեզ հետ ռազբորկաների լեզվով խոսել: Այդ տեղեկությունները չէին համապատասխանում իրականությանը»:
Մարուքյանն ասաց, որ Հայրապետյանի հետ հարաբերությունները չեն խաթարվել. «Քաղաքական ամբիոն է, քաղաքական ամբիոնից էմոցիոնալ ելույթներ են լինում եւ միշտ լինելու են: Բանավեճեր են, մարդիկ ռոբոտ չեն»:
Մեր դիտարկմանը, որ ձեզ սպառնացին, ասացին՝ եթե ձեր ոճը չփոխեք, իրենք էլ ձեր հետ այլ ոճով կխոսեն՝ Մարուքյանը պատասխանեց. «Ես էլ ասեցի՝ ի՞նչ կանեք, այ որ իմանաք, ինձ կասեք»:
Հռիփսիմե ՋԵԲԵՋՅԱՆ
