Այսօր լրագրողների հետ հանդիպման ժամանակ տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանը ներկայացրեց ավտոմեքենաների տեխզննման նոր համակարգը: Այս նոր առցանց համակարգում մեքենաների ամբողջական բազան է, որտեղ ավտոմեքենաների մասին տեղեկատվություն է ամփոփվում՝ արտադրման տարեթիվը, տեխնիկական յուրաքանչյուր զննությունը, վթարները, ինչ վիճակում է մեքենան, կարելի՞ է շահագործել, թե՝ ոչ. «Սա հնարավորություն կտա ձերբազատվել տեխզննության կտրոնների մշակույթից: Սա հնարավորություն կտա տիրապետել հանրապետության տրանսպորտային ամբողջ պարկի պատկերին, հնարավորություն կտա բարձրացնել ճանապարհային երթեւեկության անվտանգությունը եւ կանխարգելել հետագայում որեւէ տեսակի վթարներ»:
Համակարգը պատրաստ է, եւ ինչպես նախարարն ասաց՝ դրան միացած են լիցենզավորված տեխզննման բոլոր կենտրոնները եւ ոլորտն ազատ է, ցանկացած ընկերություն կարող է դիմել եւ միանալ համակարգին. «Այսպիսով՝ համակարգն օրինական դաշտում կկանոնակարգի, թե ինչպիսի հարաբերություններ պետք է ունենա մեքենայի տերը պետության հետ, ինչպիսի զննության պետք է ենթարկվի: Հիմա օրենսդրական դաշտի կարգավորման փուլում է»:
Արշակյանն ասաց, որ պատրաստվում են մեքենաների տեխզննման պարբերականությունը փոխել՝ ըստ դրանց շահագործման տարեթվի. «Եթե մեքենան նոր է, պարտադիր չէ, որ ամեն տարի տեխզննվի»:
Մանրամասն՝ տեսանյութում
Կարդացեք նաև
Նելլի ԲԱԲԱՅԱՆ
