Ինչպես արդեն տեղեկացրել ենք, Երևանի ընդհանուր իրավասության դատարանի Շենգավիթի նստավայրում այսօր շարունակվեց «Սասնա ծռերի» գործով դատական նիստը (նախագահող դատավոր՝ Մեսրոպ Մակյան):
Տուժողի հարցաքննությունից հետո նախագահող դատավորը հայտարարեց՝ նախորդ դատական նիստերից մեկի ժամանակ մեղադրող Պետրոսյանի կողմից դատարան է ներկայացրել փաստաբան Արայիկ Պապիկյանի կողմից գլխավոր դատախազին ուղղված դիմումը, որին կցված էր սույն գործով տուժող, սպանված ոստիկան Յուրի Տեփանոսյանի հոր` Վահրամ Տեփանոսյանի կողմից որոշակի փաստերի մասին տեղեկություններ պարունակող լազերային սկավառակ: Պարոն Պետրոսյանը միջնորդություն էր ներկայացրել նշված լազերային սկավառակը գործին կցելու: Դատարանում միջնորդությունը բավարարվեց. տեսանյութերը հետազոտվեցին:
Լրագրողների հետ զրույցում Յուրի Տեփանոսյանի հայր Վահրամ Տեփանոսյանը հայտարարեց, որ իր որդուն սպանել են ոստիկանները, ոչ թե «Սասնա ծռերը»: Նա մանրամասնեց. «Սա թատրոն է, կապիկություն, սա դատավարություն չէ: Սերժ Սարգսյանը կանչել է Գասպարյան Վովային, ասել է մի զոհ է պետք, որ գցեն «Սասնա ծռերի» վրա: Գուրգենն էլ ասել է՝ այս մարդուն խփեք: Իմ տղան ինձ պատմում էր, որ ինքը չի կատարում իրենց հրամանները. ժողովրդին չի ծեծում, ուստի ուզում են իրեն հակա հանեն»:
Պաշտպան Զարուհի Փոստանջյանը հայտարարեց, որ պարտադիր պետք է լսել Վահրամ Տեփանոսյանին: Զարուհի Փոստանջյանը հայտարարեց. «Նա ասում է, որ պատվիրատուն եղել է Սերժ Սարգսյանը, պարտադիր պետք է լսենք իրեն։ Նաև մի խնդրանք ունեմ. իմ պաշտպանյալ Արմեն Բիլյանը գտնվում է նախնական կալանքի տակ, իսկ անցյալ նիստը հետաձգվել էր անորոշ հիմքով։ Ուստի խնդրում եմ արագացնել դատաքննությունը: Պետք է խնդրեմ՝ արագ լսենք Վահրամ Տեփանոսյանին և որոշում կայացնենք նախնական կալանքի տակ գտնվող իմ պաշտպանյալի հարցով»։
Կարդացեք նաև
Ներկայացված միջնորդությունը դատարանը բավարարեց. Վահրամ Տեփանոսյանը ճանաչվեց որպես վկա, և նա կկանչվի հարցաքննության:
Այնուհետև դատարանը հարցաքննեց Յուրի Տեփանոսյանի իրավահաջորդ Տիգրան Գրիգորյանին: Նա ներկայացավ՝ ընտանիքի քավորն է, նաև մասնակցել է Յուրի Տեփանոսյանի դիակի դատաբժշկական փորձաքննությանը:
Տաթև ՀԱՐՈՒԹՅՈՒՆՅԱՆ
