«Էդմոն Մարուքյան, երեք ամիս է՝ հայտարարում եք, թե ուժային մարմինների հանդեպ չկա խորհրդարանական վերահսկողություն: Խորհրդարանական վերահսկողությունը խորհրդարանի գործողությունների համախումբն է, որը նրան հնարավորություն է տալիս հետեւել, թե գործադիրն ինչպես է իրականացնում իր գործառույթները»,-ԱԺ-ում այսօր կառավարության նոր կառուցվածքի մասին նախագծի քննարկման ժամանակ հայտարարեց «Իմ քայլը» խմբակցության պատգամավոր Համազասպ Դանիելյանը՝ դիմելով «Լուսավոր Հայաստան» խմբակցության ղեկավար Էդմոն Մարուքյանին:
Հիշեցնենք՝ ԼՀԿ-ն պնդում է, որ ԱԱԾ-ն եւ Ոստիկանությունը պետք է դառնան նախարարություններ եւ չլինեն վարչապետին անմիջապես ենթակա, որպեսզի հնարավոր լինի այդ կառույցների հանդեպ խորհրդարանական վերահսկողություն իրականացնել:
Համազասպ Դանիելյանը Մարուքյանի ուշադրությունը հրավիրեց այն փաստի վրա, որ ԱԺ քննիչ հանձնաժողովի եւ լսումների միջոցով նա կարող է ԱԺ հրավիրել ուժային կառույցների ղեկավարներին եւ բացատրություններ պահանջել ինչ-ինչ հարցերի վերաբերյալ: «Դուք հայտարարում ենք, որ քանի դեռ չկա խորհրդարանական վերահսկողություն (որն իրականում կա), ՀՀ-ն խորհրդարանական պետություն չէ, հետեւաբար՝ ժողովրդավարական չէ… Էդմոն Մարուքյան, դուք ո՞ւմ կողմից եք խաղում: ՀՀ-ն ժողովրդավարական է, եւ էլ ավելի ժողովրդավարական պետք է դառնա: Ես ձեզ նորից հրավիրում եմ աշխատել այդ ուղղությամբ»:
Կարդացեք նաև
Հիշեցնենք, որ կառավարության նոր կառուցվածքը ենթադրում է ոչ թե 17, այլ 12 նախարարություն:
Լուիզա ՍՈՒՔԻԱՍՅԱՆ
