ՀՀ գլխավոր դատախազ Արթուր Դավթյանն այսօր լրագրողների հետ զրույցում հաստատեց, որ «Մարտի 1»-ի գործով դատապարտված անձանց գործերը վերանայվելու են: «Գործընթացը սկսել ենք արդեն, մենք ապահովել ենք որոշակի հրապարակայնություն։ Մենք արդեն ունենք քրեական գործեր, որոնցով մենք ինքներս ենք դիմել Վճռաբեկ դատարան»,- ասաց դատախազը` հիշեցնելով, որ Մուշեղ Սաղաթելյանի գործով հենց ինքն է վճռաբեկ բողոք ներկայացրել:
Հիշեցնենք, վճռաբեկ բողոք նաեւ Մուշեղ Սաղաթելյանի պաշտպաններն էին ներկայացրել: Վճռաբեկ դատարանը վարույթ ընդունելու որոշում է կայացրել:
Գլխավոր դատախազն ասաց, որ եւս մեկ քրեական գործով դատախազությունը բողոք է ներկայացրել վճռաբեկ դատարան: Թե ո՞ր`չհստակեցրեց: Ասաց, որ գործընթացը շարունակական է լինելու:
Կարդացեք նաև
Հարցին՝ հնարավո՞ր է, որ վարչապետի գործը եւս վերանայվի, քանի որ Նիկոլ Փաշինյանը եւս դատապարտվել էր «Մարտի 1-ի» իրադարձություններից հետո, գլխավոր դատախազը պատասխանեց. «Նախկինում կայացված դատական ակտերում առկա փաստական տվյալները համադրվում են նոր տվյալների հետ եւ երբ օրենքի տառին համապատասխան նոր երեւան եկած հանգամանքներով վարույթներ իրականացնելու անհրաժեշտություն տեսնենք, անկախ նրանից՝ ով է նա, կիրականացվի»:
Հիշեցնենք, որ Նիկոլ Փաշինյանը «Մարտի 1-ի» գործով 2010 թվականին դատապարտվել էր 7 տարվա ազատազրկման եւ ազատ է արձակվել 2011 թվականի մայիսի 26-ին հայտարարված համաներման համաձայն։
Նելլի ԳՐԻԳՈՐՅԱՆ
