«Ասում եք, թե սա կառավարության որոշելիքն է: Սահմանադրությունն էլ ասում է, որ դա որոշվում է օրենքով: Առիթը բաց չեք թողնում՝ գնդակահարելու խորհրդարանական վերահսկողության ինստիտուտը: Հիմա կառավարություն է մեզ վերահսկո՞ւմ, թե մենք՝ կառավարությանը»,-ԱԺ-ում այսօր կառավարության նոր կառուցվածքի մասին նախագծի քննարկման ժամանակ հայտարարեց ԲՀԿ պատգամավոր Գեւորգ Պետրոսյանը՝ դիմելով «Իմ քայլը» խմբակցությանը:
Վկայակոչելով «Իմ քայլի» պատգամավոր Վահագն Հովակիմյանի հայտարարությունը, թե կառավարության նոր կառուցվածքը մշակելիս հաշվի են առել նաեւ հարկատուների միջոցների խնայողությունը, Գեւորգ Պետրոսյանը նշեց. «Հարկատուների միջոցները պետք է խնայել՝ պետական մարմիններում անիրազեկ մարդկանց պաշտոնի չնշանակելով: Ձեզ ո՞վ է ասում՝ անգրագետներին պաշտոնի նշանակել: Ոմանք եթե վկայականը կորցնեն, չեն հիշի, թե ինչ են աշխատում: Այստեղ որոշ պատգամավորներ աշխատաժամանակն օգտագործում են «Ֆեյսբուքը» փորփրելով»:
Ինչ վերաբերում է ԼՀԿ ղեկավար Էդմոն Մարուքյանի՝ կոստյումի օրինակով գործող իշխանությանը նախորդի հետ համեմատելուն, Գեւորգ Պետրոսյանը վրդովված ասաց. «Ի՞նչ կոստյումի մասին է խոսքը: Ամեն անգամ գալիս-հիշում եք նախորդ իշխանության արածները: Ա՜յ մարդ, նրանք անցան գնացին, միայն հուշեր մնացին…Բա Դուք ի՞նչ եք անում»:
Կարդացեք նաև
Հիշեցնենք, որ կառավարության նոր կառուցվածքը ենթադրում է ոչ թե 17, այլ 12 նախարարություն:
Լուիզա ՍՈՒՔԻԱՍՅԱՆ
