ԱԺ-ում այսօր ՀՀ կառավարության կառուցվածքի մասին օրենքի նախագծի քննարկման ժամանակ «Լուսավոր Հայաստան» խմբակցության պատգամավոր Արկադի Խաչատրյանն արդարադատության նախարար Արտակ Զեյնալյանին, որը նախագծի զեկուցողն է, հարցրեց՝ «Եթե գյուղատնտեսության նախարարությունը նախատեսում են միավորել, ո՞վ է պատասխանատու լինելու այդ կարեւոր ոլորտի համար»: Արտակ Զեյնալյանը տեղեկացրեց՝ Էկոնոմիկայի նախարարության կազմում լինելու են գյուղատնտեսության ոլորտի պատասխանատուներ, որոնք նախագծեր են մշակելու եւ ներկայացնելու կառավարությանը. «Նույնը վերաբերում է նաեւ մշակույթի ոլորտին»:
Արկադի Խաչատրյանը համոզմունք հայտնեց, որ այդ ոլորտի համար առանձին նախարարություն է պետք. «Ճիշտ չէ, որ ասում եք, թե գյուղատնտեսությունն առաջնահերթություն է, բայց նախարարության անվանման մեջ անգամ «գյուղատնտեսություն» բառը չկա: Բացի այդ, ո՞վ է պատասխանատու լինելու նորարար մտքի համար»:
Արտակ Զեյնալյանը պատասխանեց. «Անվանումներին շատ ենք տուրք տալիս: Այդ առաջարկն առաջինից երկրորդ ընթերցման ժամանակահատվածում կքննարկենք: Ունենք բարձր տեխնոլոգիաների եւ արդյունաբերության նախարարություն: Ողջ քաղաքականության համար պատասխանատու է կառավարությունը: Գուցե դուք դա չեք հասկանում, գուցե այլ կարծիք ունեք, բայց մեր քաղաքական համոզմունքը սա է»:
Արտակ Զեյնալյանը նաեւ տեղեկացրեց, որ առաջիկայում հնարավոր է՝ նախարարությունների թիվը կրճատվի մինչեւ յոթի. «Բայց այս պահի դրությամբ մեր համոզմունքն այն է, որ կառավարության այսպիսի կառուցվածքն է ամենաօպտիմալը: Սա միջանկյալ հանգրվան է՝ աստիճանական անցում կատարելու համար: Գուցե սա մեր երազածը չէ, բայց այն տասնյակ թեժ քննարկումների արդյունքում բյուրեղացած ցանկ է»:
Կարդացեք նաև
Հիշեցնենք, որ կառավարության նոր կառուցվածքը ենթադրում է ոչ թե 17, այլ 12 նախարարություն:
Լուիզա ՍՈՒՔԻԱՍՅԱՆ
