«25 տարի պայքարեցի հանուն արդարության ու խաղաղության, վազեցի ընդդիմության հետեւից, այսօր լաց եմ լինում, Նիկոլը ինձ խաբեց: Նիկոլ, եթե չունես ներպետական խաղաղություն, ապա մի՛ փորձիր դարավոր թշնամու հետ խաղաղ պահեր ունենալ, ծիծաղելի է»,- այսպիսի ցուցապաստառով այսօր ԱԺ մուտքի մոտ մի տարեց կին բողոքի ցույց էր անում՝ սպառնալով, որ եթե իր ցույցը խոչընդոտեն՝ ինքնահրկիզվելու է:
Կարդացեք նաև
Ինչպես պարզեցինք, ցուցարարը՝ Գոհարիկ Չիֆլիկյանը հայտարարել է հացադուլ. «Կա՛մ մահ, կա՛մ ճշգրիտ դատավարություն: Իմ պահանջն է ԱԺ բոլոր պատգամավորներից՝ ինձ տալ իմ հարցի պատասխանը՝ գրավոր փաստաթուղթ կեղծելը եւ օգտագործելը պատժելի՞ արարք է, թե՞ ոչ»: Կինը վստահեցնում է, որ նախկին բռնապետական հանցավոր ռեժիմից հետո ոչինչ չի փոխվել, դեռ ավելի վատ է. «Իմ սպասած հեղափոխությունը այլ էր՝ ոչ թե թալանչիներից թալանելը, այլ քաղաքացու մատի փուշը հանելը…Թավշյա հեղափոխությո՞ւն, թե՞ թավշյա խաբեություն, խաբելով ո՞ւր պիտի հասնեք՝ արտագա՞ղթ»:
Ցուցարարը վստահեցնում է, որ նախկին գլխավոր դատախազ Աղվան Հովսեփյանը փաստաթուղթ է կեղծել ու Պարոնյան 1 հասցեում գտնվող 3 սենյականոց թիվ 65 բնակարանը իրենով է արել: Նրա պատմելով՝ գործին խառնված է նաեւ Արտաշես Գեղամյանը, այլ նախկին պաշտոնյաներ: Մանրամասները՝ տեսանյութում:
Հռիփսիմե ՋԵԲԵՋՅԱՆ
