Եվրաինտեգրման հարցերի հանձնաժողովի նախագահ Արման Եղոյանին Aravot.am-ը հարցրեց՝ օրերս Արմեն Աշոտյանից տեղեկացանք, որ Հունգարիան վավերացրել է Հայաստան-ԵՄ համաձայնագիրը, նախ ինչո՞ւ է նա հայտնում այդ տեղեկությունը, ոչ թե իշխանության ներկայացուցիչները: Եղոյանը պատասխանեց. «Իսկ ինչո՞ւ ոչ: Օգտակար գործով է զբաղված պարոն Աշոտյանը»:
Մենք հետաքրքրվեցինք, թե ինչպես է գնահատում համաձայնագրի վավերացման գործընթացը եւ առհասարակ Հայաստան-Հունգարիա հարաբերությունները: Արման Եղոյանը պատասխանեց.
«Հիմա Հունգարիայի հետ հարաբերությունները հայտնի դեպքից հետո սառեցված են, ըստ էության, մենք հիմա հարաբերություններ չունենք: Հույս ունեմ, որ առաջիկայում որոշակիորեն քայլեր կարվեն՝ հարաբերությունները ակտիվացնելու ուղղությամբ: Նախ, պետք է հասկանանք հունգարական կողմի մտադրությունները, կարծում եմ, կարող ենք ակնկալել որոշակի շարժ»:
Հարցին՝ սա ժե՞ստ էր, կարելի՞ է այդպես գնահատել՝ Եղոյանը պատասխանեց. «Ես միգուցե կարող եմ գեղեցիկ տեքստով պատասխանել, բայց ասել եմ՝ վավերացման գործընթացը զուտ տեխնիկական է: Ես չեմ պատկերացնում իրավիճակ, որ ԵՄ անդամ որեւէ երկիր կտրականապես հրաժարվի վավերացնել այս համաձայնագիրը, քանի որ համաձայնագիրը ստորագրվել է ընդամենը մեկուկես տարի առաջ եւ գրեթե բոլոր երկրներում իշխող ուժը նույնն է ե՛ւ գործադիրում, ե՛ւ օրենսդիրում եւ եթե իրենց գործադիրը համաձայնվել է, նախարարների խորհրդում իրենք համաձայնվել են, ես չեմ պատկերացնում, որ նույն քաղաքական ուժի ներկայացուցիչը խորհրդարանում պիտի իրենց իսկ թեւի ստորագրած համաձայնագրին դեմ լինի: Նաեւ չկա փոփոխություն ՀՀ-ԵՄ անդամ որեւէ երկրի միջեւ հարաբերություններում այս մեկուկես տարվա ընթացքում, որ որեւէ պատճառով իրենք դեմ լինեն»:
Կարդացեք նաև
Արման Եղոյանը հայտարարեց, որ «վավերացման գործընթացին տրվող այս կարեւորությունը համարում եմ գերագնահատված»:
Մանրամասները՝ տեսանյութում
Հռիփսիմե ՋԵԲԵՋՅԱՆ
