Անդրադառնալով ընդդիմության դժգոհություններին՝ այսօր ԱԺ նախագահ Արարատ Միրզոյանը լրագրողների հետ զրույցում ասաց, որ երբ ընդդիմությունը ռացիոնալ առաջարկ է անում, ընդունում են, այնպես չի, որ բոլոր դեպքերում մերժում է մեծամասնությունը. «Ընդդիմության բազմաթիվ նախագծեր արժանացել են դրական վերաբերմունքի, դարձել են օրենք: Ո՞վ է ասել, որ ընդդիմության բոլոր նախաձեռնությունները պիտի դառնան օրենք եւ մեծամասնությունը կողմ քվեարկի, նման բան կա՞: Սկի մեծամասնության բոլոր նախաձեռնությունները չեն դառնում օրենք»:
Հարցին՝ Նաիրա Զոհրաբյանը խորհրդարանական ամբիոնից ասաց, որ եթե Փաշինյանը չլիներ, ձեր խմբակցության շատ պատգամավորներ չէին լինի՝ Արարատ Միրզոյանը պատասխանեց. «Ինչ-ինչ՝ անլուրջ վերաբերմունք «Իմ քայլը» խմբակցության նկատմամբ խորհուրդ չէի տա»:
Մեր հարցին՝ ձեզ ասում են՝ ինչի՞ եք անընդհատ հակահեղափոխական փնտրում, գործ արեք՝ Միրզոյանն արձագանքեց. «Ժողովուրդ ջան, գործն էլ է արվում»: Նա ասաց, որ որոշ շրջանակների կողմից սաբոտաժ չկա, բայց մանիպուլյացիաներ կան. «Փորձել չտեսնել լավը եւ նույնիսկ որոշ դեպքերում ավելացնել ոչ հավաստի ինֆորմացիա կամ եղածը այլ կերպ ներկայացնել, չգիտե՞ք, որ այդ մանիպուլյացիաները շարունակվում են»:
Լրագրողները փոխանցեցին, որ Մարուքյանն ասում է՝ ԱԺ-ում լարվածությունը լինում է, որովհետեւ պարբերաբար իրենց հիշեցնում են իրենց չկատարած խոստումները՝ Արարատ Միրզոյանը պատասխանեց, որ դա սխալ մեկնաբանություն է: Նա վստահեցրեց, որ քայլ առ քայլ են անում խոստումներ, բոլորը միանգամից չի լինի:
Կարդացեք նաև
Հռիփսիմե ՋԵԲԵՋՅԱՆ
