ԲՀԿ առաջնորդ Գագիկ Ծառուկյանն այսօր ԱԺ-ում լրագրողների հետ զրույցում վստահեցրեց, որ իրենց ձեռքը «պուլսի վրա է, ամպագոռգոռ բաներ չեն ասում, ինչ ասում են՝ զգում են»:
Լրագրողները հետաքրքրվեցին «Առինջ մոլի» ստուգումներից: Ծառուկյանը պատասխանեց. «Հարկային մարմիններին հարցրեք, Ծառուկյանին ոչ մի բան չեն կարա անեն: Ինչ անում են, անում են՝ ի վնաս երկրի տնտեսության, ՓՄՁ-ի…Ինձ ոչ մի բան պարզ չի, քամին քարին ի՞նչ»:
Aravot.am-ը հարցրեց՝ ասում եք՝ Ծառուկյանին ոչ մի բան չեն կարող անեն, բայց ուզո՞ւմ են մի բան անեն՝ նա պատասխանեց. «Չէ, Ծառուկյանին ոչ մի բան էլ չեն կարա անեն, ինչ անեն՝ ի վնաս ժողովրդին, տնտեսությանը»:
Կարդացեք նաև
Գագիկ Ծառուկյանն ասաց, որ ՊԵԿ-ի կատարած գործերի մասին մի օր հավաքելու է լրագրողներին, ամեն ինչ «դոկումենտալ» ցույց տա, որ պարզ լինի բոլորի համար. «Թող գնան ստուգեն ինչ ուզում են»:
Մենք հետաքրքրվեցինք՝ իշխանությունների հետ այս մենամարտը ի՞նչ է նշանակում,. Ազգային ժողովում այս բանավեճը` Ծառուկյանը պատասխանեց. «Այսինքն, որոշ պատգամավորներ, որ պատգամավոր են դառել ոնց որ Նաիրա Զոհրաբյանն ասեց ում շնորհիվ, ու մարդը, որ առանց Նիկոլ Փաշինյանի, Սասուն Միքայելյանի, Արարատ Միրզոյանի ու մի քանի հոգու, նրանք 100 ձեն հավաքող չեն: Մենք ի՞նչ ենք ասում, ախպեր ջան, էսօր ամենամտահոգ խնդիրները՝ ժողովրդին անհանգստացնող: Մենք ուզում ենք լուծում տանք»:
Դիտարկմանը, որ ձեր խմբակցության մասին էլ նման պատկերացում կա, որ առանց ձեզ ձայն չեն հավաքի՝ նա պատասխանեց, որ դեմ չի, իրենց խմբակցությունում էլ կան:
Հարցին՝ ձեր մոտ ավելի ժողովրդավարակա՞ն է, քան «Իմ քայլը» դաշինքում՝ Ծառուկյանը պատասխանեց, որ պրովոկացիոն հարցեր են տալիս: Պատգամավորը պետք է մտահոգ լինի ժողովրդի համար, հարց բարձրացնի ու լուծում տա. «Հեղափոխությունը, որ կատարվել է ասենք թե սիրո հեղափոխություն, թավշյա հեղափոխություն, խոստումներ են, ժողովուրդը հավատացել է, հեղափոխություն է արել, պետք է այդ խոստումները կատարել: Դրանից հետո պետք է կլինի տնտեսական հեղափոխություն»:
Հռիփսիմե ՋԵԲԵՋՅԱՆ
