Ռուսաստանն ու ՆԱՏՕ-ն ամբողջությամբ դադարեցրել են գործակցությունը քաղաքացիական և ռազմական ուղղությամբ: Այս մասին հայտարարել է Ռուսաստանի փոխարտգործնախարար Ալեքսանդր Գրուշկոն:
«ՆԱՏՕ-ն ինքն է հրաժարվել Ռուսաստանի հետ հարաբերություններում դրական օրակարգից: Այն գոյություն չունի: Եվ առայժմ որևէ նախանշան չկա, որ ՆԱՏՕ-ն գիտի՝ ինչպես դուրս գալ այս փակուղուց»,- ասել է նա:
Գրուշկոն անհեթեթ է որակել դաշինքի որոշումը՝ դադարեցնել բնականոն աշխատանքային կապերը ռազմական գծով՝ նկատելով, որ Եվրոպայի անվտանգությունը մեծապես կախված է Ռուսաստանի և ՆԱՏՕ-ի համագործակցությունից:
Նա նաև հայտարարել է, որ անցյալ տարում ՆԱՏՕ-ի ընդհանուր ռազմական ծախսերը գերազանցել է տրիլիոն դոլարը, ինչը 22 անգամ ավելին է, քան պաշտպանության վրա Ռուսաստանի ծախսերը:
Կարդացեք նաև
Այնուամենայնիվ, Գրուշկոն ընդգծել է, որ Մոսկվան չի պատրաստվում մասնակցել ՆԱՏՕ-ի հետ ռազմական բյուջեի ավելացման մրցավազքին և շեշտը դնում է «տնտեսական, կետային և արդյունավետ միջոցների վրա»:
«Ինչ վերաբերում է ՆԱՏՕ-ի հետ ռազմական հակամարտությանը, ապա բոլոր սթափ դատողները հույս ունեն, որ նման բան տեղի չի ունենա: Դա աղետ կլիներ ամբողջ մարդկության համար: Համոզված եմ, որ դա հասկանում են և՛ Վաշինգտոնում, և՛ Բրյուսելում»,- ասել է փոխնախարարը:
Պատրաստեց՝ Վիկտորյա ԱՆԴՐԵԱՍՅԱՆԸ
