«Ինձ ինչո՞ւ են մեղադրում, ինչի՞ համար: Մնում եմ իմ կարծիքին եւ հարգում մնացածների կարծիքը»,-լրագրողների հետ ճեպազրույցում այսօր անդրադառնալով «Նորագավիթ» մաքսատան միջադեպին, երբ վարչապետի հրահանգից հետո մաքսատան աշխատակից Հայկ Մարտիրոսյանն աշխատանքից ազատման դիմում էր գրել, ասաց վարչապետ Նիկոլ Փաշինյանը: Նա նշեց. «Ասում են՝ Նիկոլը մեծամտացել է եւ ասել, թե վարչապետին այդպես չեն դիմավորում: Շարքային քաղաքացուն մոտենալը որեւէ արձագանք կառաջացնի՞, ի՞նչ եք կարծում: Մաքսային մարմիններից այդքան բողոքում են, հարյուրավոր նամակներ ենք ստանում, դա ինչի՞ մասին է խոսում»:
Նիկոլ Փաշինյանը կատարվածն այսպես է մեկնաբանում. «Կա փաստ եւ այդ փաստին արձագանք: Ես չէի նախատեսել, որ հատուկ պետք է մտնեի այդ սենյակ: Հետո հետաքրքրվել եմ: Այդ հարգարժան քաղաքացին ողջ կյանքն աշխատել է ՊԵԿ-ում, կարճ ժամանակ՝ ԱԺ-ում, ապա հետ գնացել ՊԵԿ»:
Նկատառմանն ի պատասխան, որ վարչապետը հորդորել է աշխատանքից ազատման դիմում գրել, մինչդեռ նա չունի նման լիազորություն, Նիկոլ Փաշինյանն այսպես արձագանքեց. «Բա ի՞նչ անեի: Թող չգրեր դիմում, ես ի՞նչ անեմ: Ես ունեմ դիրքորոշում, որ նման մարդիկ չեն կարող աշխատել: Լավ մասնագետը ՀՀ-ում աշխատանքի խնդիր չի կարող ունենալ: Պետական դրոշի նկատմամբ վերաբերմունք բարձրացնող որեւէ ակցիա այնքան արդյունավետ չի եղել, որքան այդ օրվա միջադեպը: Այդ օրը պետական համակարգը ինքնաշխատ եղանակով զբաղված է եղել դրոշների նկատմամբ պատշաճ վերաբերմունք մշակելով»:
Լուիզա ՍՈՒՔԻԱՍՅԱՆ
