Ինչպես տեղեկացրել ենք, «Լուսավոր Հայաստան» խմբակցությունն առաջարկում էր ԱԱԾ-ն ու ոստիկանությունը դարձնել նախարարություն, որ հաշվետու լինեն ԱԺ-ին:
Այսօր այդ առաջարկը մերժվեց եւ խմբակցության ղեկավար Էդմոն Մարուքյանը, երբ լրագրողները փոխանցեցին իշխանության հակափաստարկը, թե չե՞ք կարողանում դուք հարցեր տալ ԱԱԾ-ին կամ ոստիկանությանը, պետք է անպայման նախարարությո՞ւն լինեն՝ պատասխանեց. «Սուտ են խոսում, եթե ասում են, որ խորհրդարանականները հնարավորություն ունեն հարցեր տալու կառավարությունից դուրս գտնվող մարմինների ղեկավարներին: Հարցեր տալու իրավունքը Սահմանադրության մեջ է ամրագրված եւ Սահմանադրությունն ասում է, որ նիստերի չորեքշաբթի օրը տեղի է ունենում հարցուպատասխան, պարտադիր մասնակցում են կառավարության անդամները: Նշված անդամները կառավարության անդամ չեն: Հարցեր տալու իրավունքը այլ հարթակներում խորհրդարանական վերահսկողություն չի, մենք կարող է հյուր էլ գնանք ոստիկանապետին, իրիկունը թեյ խմենք, ու զրուցենք, կարող է իրար քավոր էլ կանգնենք, հետո՞ ինչ»:
Մարուքյանն ասաց, որ երբ իրենց խմբակցություն են կանչում ու դռնփակ նիստեր են անում, դա խորհրդարանական վերահսկողություն չի: ՀՀԿ-ի ժամանակ էլ էին կանչում իրենց նախարարներին ու դռնփակ նիստեր անում. «Խորհրդարանական վերահսկողությունը ենթադրում է հրապարակային գործընթաց»:
Հռիփսիմե ՋԵԲԵՋՅԱՆ
