«Մենք ընկերներով ոմանց ուզում էինք ցույց տալ, որ ՀՀ-ի պետականության դիմադրությունը դեռ տապալված չէ»,- «Sut Nikol» նախաձեռնության անդամների ասուլիսին հայտարարեց նախաձեռնության անդամ Արթուր Դանիելյանը:
Հիշեցնենք՝ այսօր առավոտյան ՀՀ ոստիկանության Կենտրոնի բաժին բերման ենթարկվեցին #SutNikol նախաձեռնության համակարգողներ Կոնստանտին Տեր-Նակալյանը, Նարեկ Սամսոնյանը, Արթուր Դանիելյանը: Նրանք Երևանի փողոցները պատում էին #sutNikol գրաֆիտիներով:
Նախաձեռնության անդամները հայտարարեցին՝ ՀՀ յոթ քաղաքներում բազում քաղաքացիներ, համախոհներ միացել են ակցիային և ցույց են տվել, որ ստի և կեղծիքի ալիքը դեռ ամբողջովին չի հաղթել ՀՀ-ում:
Նախաձեռնության անդամ Նարեկ Սամսոնյանը նշեց. «Նիկոլ Փաշինյանն իշխանությունը զավթել է ստով ու կեղծիքով: Նիկոլ Փաշինյանը Սերժ Սարգսյանին մեղադրում էր ստի ու կեղծիքի մթնոլորտի ստեղծմամբ իշխանություն պահելու մեջ, բայց այսօր իր իշխանությունը հիմնված է ստի ու կեղծիքի, գրպանային ընդդիմություն և քաղհասարակություն ունենալու միջոցով»:
Կարդացեք նաև
Ակցիայի մասնակիցները վստահեցրին՝ իրենց ակցիան որևէ քրեական կամ վարչական իրավախախտման տրամաբանության մեջ չի տեղավորվում:
Նախաձեռնության անդամ Կոնստանտին Տեր -Նակալյանը նշեց. «Մեր խնդիրն է վերհանել մեծ ստերը, որի վրա կառուցվեց հեղափոխությունը: Նիկոլ Փաշինյանն ինքը հերթով սկսել է հերքել, մերժել, անել հակառակը իր իշխանության առաջին ամիսներին: Լայն հանրության համար արդեն տեսանելի են այն ստերը, որոնք արվել են գործող իշխանության կողմից»:
Ըստ Կոնստանտին Տեր-Նակալյանի՝ վերջապես պետք է սկսել խոսել ճիշտը, ոչ թե ցանկությունների, այլ միֆերի մասին. «Կլինի Սաշիկի չարագործությունների մասին, թե Նիկոլի անքննելի սրբության մասին միֆը»:
Նախաձեռնության անդամները հայտարարեցին դրամահավաքի և մրցույթի մասին: Քաղաքացիները կարող են արվեստի միջոցով ներկայացնել Նիկոլ Փաշինյանի հայտնի ամենասուտ նախադասությունը: Հաղթողները կստանան 1000 ԱՄՆ դոլարին համարժեք դրամ: Ասուլիսի մասնակիցները թվարկեցին Նիկոլ Փաշինյանի հայտարարած մի շարք, իրենց կարծիքով, սուտ խոստումներ: Օրինակ՝ Սաշիկ Սարգսյանը սաղ բիզնեսներում 50 տոկոս փայ ունի, ՀՀ-ում դատարանները որևէ մեկի կողմից զանգերի չեն ենթարկվում, ապրիլյան քառօրյան կազմակերպվել է ՀՀԿ-ի, ՌԴ-ի և Ադրբեջանի հետ պայմանավորվածությամբ, 50.000 աշխատատեղեր են բացվել:
Հարցին՝ ինչո՞ւմ են իրենց մեղադրում, Կոնստանտին Տեր-Նակալյանը պատասխանեց. «Մեզ մեղադրում են հանրային սեփականության ոչ նպատակային օգտագործման մեջ: Բայց դա իրավաչափ չէ»:
Արթուր Դանիելյանը հավելեց. «Մենք գիտենք, որ ասֆալտը երկու բանի համար է՝ երթևեկելու ու փռելու: Իրավապահները պետք է ապացուցեն, որ մենք այդ երեք գործառույթներից դուրս բան ենք արել: Ըստ էության մենք փռել ենք ասֆալտին, ուրիշ հարց, որ փոխաբերական իմաստով: Այսինքն՝ բուն ասֆալտն իր նպատակին ծառայել է»:
Նախաձեռնության անդամները նշեցին, որ գրաֆիտիներն արել են ասֆալտին, որ քաղաքին վնաս չպատճառեն և արել են առավոտյան շուտ, որ չխանգարեն երթևեկությանը:
Այնուհետև հարց բարձրացրին՝ ինչո՞ւ անդրավարտիքով արագաչափ փակողին չէին պատժում, մերժիր Սերժին, երբ գրում էին շենքերի վրա, անգամ նրանց չէին պատժում:
Տաթև ՀԱՐՈՒԹՅՈՒՆՅԱՆ
