Ինչպես ավելի վաղ հայտնել էինք, ՀՀ սահմանադրական դատարանի դատավորի թափուր պաշտոնում ՀՀ նախագահ Արմեն Սարգսյանի առաջադրած թեկնածու Գոռ Հովհաննիսյան այսօր ԱԺ-ում հանդիպեց նաեւ «Իմ քայլը» խմբակցության պատգամավորների հետ:
Փակ քննարկումից հետո խմբակցության ղեկավար Լիլիթ Մակունցը լրագրողներին ասաց. «Հետագայում պարզ կլինի, թե որքանով մեզ բավարարեց թեկնածուի հետ հարցուպատասխանը: Ամեն դեպքում, ԱԺ-ում փակ՝ գաղտնի քվեարկություն է լինելու»:
Անդրադառնալով մամուլում առկա այն տեղեկություններին, որ իշխող կուսակցությունը հակված չէ Գոռ Հովհաննիսյանին ընտրել, որովհետեւ նախընտրում է Վահե Գրիգորյանի թեկնածությունը, Լիլիթ Մակունցը նշեց. «Մամուլի առանձին հրապարակումների առնչությամբ ասելիք չունեմ: Մեզ մոտ այդ թեմայով քննարկում չի եղել»:
Հիշեցնենք, որ Սահմանադրական դատարանի դատավորի ընտրության հարցը ԱԺ-ն կքննարկի ապրիլի 16-ի նիստում: Նախորդ տարի ՍԴ դատավորի թեկնածու, փաստաբան Վահե Գրիգորյանը չէր ընտրվել. քվեարկությանը 53 պատգամավոր էր մասնակցել:
Լուիզա ՍՈՒՔԻԱՍՅԱՆ
