ՀՀ սահմանադրական դատարանի դատավորի թափուր պաշտոնում ՀՀ նախագահ Արմեն Սարգսյանի առաջադրած թեկնածու Գոռ Հովհաննիսյան այսօր ԱԺ-ում շարունակում է խմբակցությունների հետ հանդիպումները: «Լուսավոր Հայաստան»-ի հետ հանդիպումից հետո լրագրողների հետ զրույցում նա ասաց, որ սահմանադրական իրավունքին եւ Սահմանադրական դատարանին վերաբերող մասնագիտական հարցեր են քննարկել: «Կարծում եմ՝ լավ տպավորություն կար: Մեր զրույցը ինձ դուր եկավ: Հուսամ՝ ես էլ եմ լավ տպավորություն գործել խմբակցության պատգամավորների վրա»,-նշեց Գոռ Հովհաննիսյանը:
Նա այսօր հանդիպելու է նաեւ «Իմ քայլը» խմբակցության պատգամավորների հետ:
Անդրադառնալով մամուլում առկա այն տեղեկություններին, որ իշխող կուսակցությունը հակված չէ իրեն ընտրել, որովհետեւ նախընտրում է Վահե Գրիգորյանի թեկնածությունը, Գոռ Հովհաննիսյանը տեղեկացրեց. «Ես նման բան չեմ լսել, պատճառները չգիտեմ: Ես ինքս պատճառ չեմ տեսնում»: Հարցին՝ «եթե ԱԺ-ն չընտրի ձեզ, ինչպիսի՞ն կլինի ձեր դիրքորոշումը», Գոռ Հովհաննիսյանը պատասխանեց. «Ես այդ որոշումը կընդունեմ որպես իմ օգնության առաջարկի մերժում. ես մասնակցել եմ մրցույթին մեկ նպատակով՝ գտնում եմ, որ սահմանադրական իրավունքի ոլորտում լուրջ անելիքներ կան»:
Հիշեցնենք, որ Սահմանադրական դատարանի դատավորի ընտրության հարցը ԱԺ-ն կքննարկի ապրիլի 16-ի նիստում: Նախորդ տարի ՍԴ դատավորի թեկնածու, փաստաբան Վահե Գրիգորյանը չէր ընտրվել՝ պատգամավորների բավարար քվորումի բացակայության պայմաններում:
Կարդացեք նաև
Լուիզա ՍՈՒՔԻԱՍՅԱՆ
