Նամակ ՀՀ վարչապետ Նիկոլ Փաշինյանին
Հարգելի պարոն վարչապետ, թույլ տվեք Ձեր ուշադրությունը սեւեռել մի խնդրի վրա, որի մասին ժամանակին տեղեկացրել եմ: Այս տարի նշվում է Ամենայն հայոց բանաստեղծ Հովհաննես Թումանյանի 150-ամյակը, որի ծննդյան օրը Դուք եւս արտասանեցիք մեծ լոռեցու բանաստեղծությունը: Երբ Դուք պատգամավոր էիք, մեծ ոգեւորությամբ արձագանքեցիք քանդակագործ Արտիկ Քոչարյանի ծրագրին՝ տեղադրել բանաստեղծի հայրենիքում արձանախումբ՝ նվիրված հոբելյանին: Դուք դիմեցիք այն ժամանակվա մշակույթի նախարարին՝ Արմեն Ամիրյանին, որը, սակայն, մատնանշելով ֆինանսական խնդիրները, չկարողացավ որեւէ բանով օգնել, շեշտելով, որ հիշյալ համալիրի ստեղծման հարցին հնարավոր կլինի անդրադառնալ լրացուցիչ ֆինանսական միջոցների ի հայտ գալու դեպքում:
Երբ Դուք դարձաք երկրի վարչապետ, ես կրկին դիմեցի Ձեզ նույն խնդրով: Եվ ոչ միայն ես: Դսեղ, Դեբետ, Չկալով համայնքների ղեկավարները (Գ. Հովսեփյան, Ա. Ղազարյան, Ռ. Շաքարյան) եւս հիշեցին Արտիկ Քոչարյանի ծրագրի մասին, պատրաստակամություն հայտնեցին աջակցել հողհատկացման եւ այլ հարցերում: Սակայն առաջընթաց չկա:
Կարդացեք նաև
Ժամանակն անցնում է, Ձեզանից պատասխան չկա: Գուցե դիմումները Ձեզ չեն հասել: Այնուամենայնիվ, հուսով եմ, որ Դուք կարձագանքեք եւ կօգնեք իրագործել այդ գեղեցիկ, հայ ժողովրդի մեծ զավակին արժանի գաղափարը: Սպասում ենք բոլորս պատասխանի:
Հարգանքով՝ ՍԻՄՈՆ ԱԼԱՎԵՐԴՅԱՆ
«Առավոտ» օրաթերթ,
13.04.2019
