ՀՀ Պետեկամուտների կոմիտեն ԳԱԼԱ-ի գործով ներկայացրել է վերաքննիչ բողոք՝ պահանջելով բեկանել ՀՀ վարչական դատարանի 22.02.2019թ. կայացրած վճիռը և այն փոփոխել, իսկ ներկայացված հայցն ամբողջությամբ մերժել:
Շուրջ 12 տարվա վաղեմություն ունեցող գործն, ըստ էության, ոչ միայն չի հանգուցալուծվում, այլև տեղի են ունենում ուշագրավ զարգացումներ: Հիշեցնենք, 2008-ին հարկային պետական ծառայության հայցը դատարանը բավարարեց, և ԳԱԼԱ-ից բռնագանձվեց ավելի քան 25 միլիոն դրամ:
Այս գործով կա Մարդու իրավունքների եվրոպական դատարանի վճիռ, որն արձանագրում է՝ անհիմն կերպով ԳԱԼԱ-ի արդար դատաքննության իրավունքները ոտնահարել են ներպետական դատական ատյանները (Մարդու իրավունքների եվրոպական կոնվենցիայի 6-րդ հոդվածի 1-ին և 3-րդ կետեր):
Եվրադատարանի վճռից հետո գործը կրկին լսվեց ՀՀ վարչական դատարանում, որտեղ հնչած ցուցմունքը բավական էր հասկանալու համար՝ ինչ է տեղի ունեցել ԳԱԼԱ-ի գործով 12 տարի առաջ: Հրապարակային հայտարարվեց այն, ինչի մասին տարիներ շարունակ բարձրաձայնվել էր: «Ինչ որ ասել է КГБ-ն, դա էլ գրել եմ»՝ վկայի այս մեկ նախադասությունը փլուզեց իրավական ամբողջ գործընթացը՝ ապացուցելով կատարվածի քաղաքական բնույթն ու բովանդակությունը:
Կարդացեք նաև
Վարչական դատարանը 2019 թվականին որոշեց բավարարել ԳԱԼԱ-ի հայցը:
Նոր Հայաստանում, երբ թվում է քաղաքական պատասխանատվություն ստանձնելով՝ նախկին իշխանությունների սխալների համար ներողության խոսքեր պետք է լսեինք, ԳԱԼԱ-ի դեմ կազմված ակտի «օրինականությունն» ապացուցելու համար, որքան էլ տարօրինակ է, ՀՀ ՊԵԿ-ը վերաքննիչ բողոք է ներկայացնում:
Ռոբերտ Քոչարյանի տված քաղաքական հրահա՞նգն են փորձելու ավարտին հասցնել: Ի պատասխան այս հարցադրմանը՝ ՊԵԿ նախագահ Դավիթ Անանյանը հայտարարում է.
«Ակնհայտ իրավական պրոցեսը դուք ուզում եք քաղաքական որակել…»:
Դավիթ Անանյանի այս խոսքերը հիշեցրին ճիշտ նույնաբովանդակ մի հայտարարություն, որն արել էր Ռոբերտ Քոչարյանը 2007 թ.՝ ԳԱԼԱ-ի հարցին ի պատասխան, և ում նախագահության տարիներին հեռուստաընկերության դեմ քաղաքական հետապնդում սկսվեց:
«Չեմ կարծում, որ որևէ հեռուստատեսություն պետք է հարկային դաշտից դուրս լինի: Ինչքան գիտեմ, խնդիրներն ավելի շատ հարկային դաշտի հետ են կապված»,- հայտարարել էր Ռ. Քոչարյանը:
Այսքանից հետո գործից անտեղյակ կամ այդպիսին ներկայացող ՊԵԿ նախագահ Դավիթ Անանյանին արժե հարցնել՝ որտեղի՞ց է գալիս և հայտարարություններ անելուց առաջ ինչո՞ւ չի պատրաստվել, և դա հարցնել նույնպիսի շեշտադրմամբ և տոնայնությամբ, ինչպես որ ինքն է հաղորդակցվում լրագրողի հետ՝ «Ախր ա՛յ ազիզ ջան, որտեղի՞ց եք գալիս, ի՞նչ հարց եք տալիս… մի հատ պատրաստվեք էլի՛…»:
ԳԱԼԱ ՀԵՌՈՒՍՏԱԸՆԿԵՐՈՒԹՅԱՆ ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ
