Ատլանտյան խորհրդում օրերս տեղի ունեցավ համաժողով նվիրված Եվրոպական հարևանության քաղաքականության ու Արևելյան գործընկերության 10- ամյակին: ԵՄ և գործընկերության անդամ երկրների ներկայացուցիչները քննարկել են անցած 10 տարին ու հետագա համագործակցության ընթացքը։
«Մեր շահերից է բխում, որ մեր հարևանությամբ գտնվող երկրները լինեն կայուն, սերտ հարաբերություններ ունենան մեզ հետ ոչ միայն քաղաքական, այլև տնտեսական առումով»,- Վաշինգտոնում հայտարարել է Եվրոպական հանձնաժողովի հարևանության և ընդլայնման հարցերով հանձնակատար Յոհանես Հանը Ատլանտյան խորհրդի կազմակերպած՝ Եվրոպական հարևանության քաղաքականության ու Արևելյան գործընկերության 10-ամյակին նվիրված համաժողովին:
Հանձնակատար Հանն ընդգծել է Եվրամիության պատրաստակամությունը շարունակել աջակցել Արևելյան գործընկերություն անդամ երկրներին՝ վերջիններիս կայունությանն ու զարգացմանը հասնելու նպատակով:
«Խոսքը գնում է Եվրոպայի շուրջ բարեկեցության գոտի ձևավորելու մասին»,- նշել է հանձնակատարը:
Կարդացեք նաև
Համաժողովն իր շուրջն էր համախմբել Արևելյան գործընկերության երկրների ու միջազգային մի շարք կառույցների ներկայացուցիչներին: Քննարկումների հիմքում էր եվրոպական արժեքների ինտեգրացումը, տնտեսական զարգացումն ու Արևելյան գործընկերության դերը:
«Եվրոպական ինտեգրացումը տեղի է ունենում բազմաթիվ նորմերի ու չափանիշների ընդունմամբ: Այն պահանջում է քրտնաջան աշխատանք, ուստի լավագույն ճանապարհը հետևողական և մշտական աշխատանքն է, որը կմոտեցնի տնտեսությունն ու հանրությանը Եվրոպային»,- ասում է Եվրոպական հանձնաժողովի հարևանության և ընդլայնման շուրջ բանակցությունների գծով գլխավոր տնօրենի տեղակալ Կատարինա Մատերնովան:
Վերջինս գոհունակություն հայտնեց այսօր Արևելյան գործընկերության շրջանակում Հայաստանի հետ ունեցած հարաբերությունների զարգացման ընթացքից՝ ընդգծելով, որ չնայած Հայաստանը հրաժարվել է DCFTA առևտրային համաձայնագրի ստորագրումից, կողմերին հաջողվել է Եվրոպական հարևանության քաղաքականության շրջանակում հասնել ընդհանուր հայտարարի ու կնքել պայմանագիր: Նա Եվրամիության աջակցությունն է հայտնել Հայաստանում տեղի ունեցած փոփոխություններին ու գործող իշխանությանը՝ ընդգծելով Եվրոպայի պատրաստակամությունը օժանդակելու հետագա բարեփոխումների ընթացքին:
Վերլուծաբան Ջոնաթան Կացը վստահ է, որ Հայաստանի եվրաինտեգրումը հնարավոր է:
«Հայաստանն ունի բոլոր անհրաժեշտ բաղադրիչները խորացնելու իր հարաբերությունները Եվրամիության հետ: Չնայած պայմանագիրը Ասոցիացման համաձայնագիր չէ, սակայն Եվրամիությունը դիտարկում է Հայաստանը որպես գործընկեր, իսկ Հայաստանը Եվրամիությանը՝ որպես քաղաքական և տնտեսական ուղեգիծ»,- հայտնել է Կացը:
Նյութն ամբողջությամբ՝ սկզբնաղբյուր կայքում
