ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովի որոշմամբ՝ կստեղծվեն յոթ աշխատանքային խմբեր, որոնք ամեն ամիս պատգամավորների հետ կքննարկեն շրջակա միջավայրին առնչվող հրատապ հարցերը: Քննարկման առարկա կդառնան նաեւ այն օրինագծերը, որոնք հանձնաժողովի անդամները կբերեն օրակարգ:
Ինչպես այսօր հանձնաժողովի նիստում հայտարարեց հանձնաժողովի նախագահ, «Իմ քայլը» խմբակցության պատգամավոր Վարազդատ Կարապետյանը, եթե, օրինակ, առաջիկայում հայտարարեն, որ սկսելու ենք աշխատել «Ընդերքի մասին» ՀՀ օրենքի վրա, աշխատանքային խմբերին, նաեւ՝ ոլորտի հ/կ-ներին, կխնդրեն հավաքվել եւ կարծիք ներկայացնել:
«Կառաջնորդվենք եւ իրենց թեմաներով, եւ մեր օրակարգով»,-նշեց Վարազդատ Կարապետյանը: Նրա փոխանցմամբ՝ ոլորտի կազմակերպությունները կարող են ներգրավվել աշխատանքային խմբերի կազմում եւ իրենց ցանկությամբ էլ դուրս գալ: Ամեն խումբ կունենա Բնապահպանության նախարարության համապատասխան պաշտոնյայի ներկայությունն ապահովելու հնարավորություն: Աշխատանքային խմբերի ոլորտներն են՝ ջրային ռեսուրսների արդյունավետ կառավարում, հանքարդյունաբերության օրենսդրության վերլուծություն, Սեւանա լճի խնդիրներ, կենդանիների պաշտպանություն, Օրհուսի կոնվենցիայի պահանջների արդյունավետ իրագործում եւ վերահսկողություն, շրջակա միջավայրի վրա ազդեցության գնահատման եւ փորձաքննության օրենսդրական շրջանակի վերլուծություն, անտառների արդյունավետ կառավարում:
Լուիզա ՍՈՒՔԻԱՍՅԱՆ
