Mind Center կենտրոնում օրերս կազմակերպվել էր հետաքրքիր միջոցառում։ Երեխաները հնարավորություն ստացան ԼԵԳՈ կոնստրուկտորներ կառուցելու և վիկտորինաներ լուծելու։ Վերջում երեխաները ռոբոտների միջոցով անակնկալ մատուցեցին իրենց մայրիկներին՝շնորհավորելով նրանց տոնը։
Նշենք նաև, որ կենտրոնում երեխաները ծրագրավորման միջոցով ստեղծում են իրենց անիմացիաները, ինտերակտիվ պատմությունները և խաղերը։
Անդրադառնալով Լեգոյի թեմային՝ փորձեցինք պարզել՝ որքանո՞վ է այն նպաստում երեխաների զարգացմանը և ինչպիսի ազդեցություն ունի վերջիններիս մտավոր աշխատանքի բարելավման գործընթացում։
Լեգո կոնստրուկցիաներ հավաքելը գրեթե բոլոր երեխաների սիրելի զբաղմունքներից է։ Մեր փոքրիկ հերոսների՝ Արմանի և Դավիթի խաղասենյակը հարուստ է լեգոյի ամենատարբեր հավաքածուներով։ Մեկը սիրում է գրքով հավաքել, մյուսը՝ լեգոյի խառը հատիկները հավաքելով իր պատկերացմամբ մի բան ստանալ։ Ըստ նրանց մայրիկի՝ լեգոյով խաղում են ավելի հանգիստ ու հավասարակշռված երեխաները։
«Լեգոյով խաղալը շատ է զարգացնում միտքը և մարզում ուղեղը, դա նպաստում է նաև մանր մոտորիկային, ստեղծագործական մտքին, պատկերային հիշողությանը, ինչպես նաև նկատվում է խոսքի կառուցողական արտաբերում»,-ասում է Աստղիկը՝ կարևորելով այն հանգամանքը, որ պետք չէ անտեսել երեխայի ընդունակությունները։
Աստղիկը փաստում է, որ անգամ լեգոյի գույները միանշանակ չեն ընկալվում․դրանք կարևոր դեր են խաղում հատկապես երևակայական մտածողության համար․«Իմ կարծիքով երեխայի տրամադրության և հոգեվիճակի հետ է կապված նաև գույների ընտրությունը։ Օրինակ Արմանը նախընտրում է «աշխատել» կապույտի հետ, ինչն էլ կապում եմ նրա խաղաղ ներաշխարհի հետ»։
Գնահատելով Դավիթի՝ լեգոյի հանդեպ ցուցաբերած մեծ հետաքրքրությունն ու կոնստրուկցիաները րոպեների ընթացքում հավաքելը՝ Աստղիկը հավաստիացնում է, որ հետագայում դա կարող է օգնել, օրինակ, ավելի լուրջ ճարտարապետ դառնալու հարցում․ «Դավիթն արդեն հստակ պլանավորել է՝ ուզում է ապագայում շենքեր նախագծել։ Ինձ թվում է՝ եթե իսկապես այդպես որոշի, լեգոն կարող է լավ հիմք հանդիսանալ»։
Գունահոգեբանական ինստիտուտի ուսումնասիրությունները ապացուցել են, որ գույներն ազդում են հոգեկանի վրա։ Աչքի ցանցաթաղանթի ռեֆլեքսոգեն հատվածում լույսի ու գույնի ազդեցության հետևանքով գլխուղեղին հասնող իմպուլսներ են ձևավորվում։ Գույները և դրանց երանգները տարբեր կերպ են անդրադառնում տրամադրության և ինքնազգացողության վրա։
Գույների բազմազանությունը, ըստ մասնագետների, կարող է նաև հակառակ ազդեցությունն ունենալ՝ ազդելով երեխայի տեսողության վրա։ Այնպես որ, հոգեբանները մայրերին խորհուրդ են տալիս հետևել երեխաների տեսողությանը և խնդիրների դեպքում օգտագործել միագույն լեգոներ և այլ խաղալիքներ։
Անուշիկ ՅՈԼՉԻՆՅԱՆ
