Երեւանի ընդհանուր իրավասության դատարանի կենտրոնի նստավայրում այսօր դատավոր Գագիկ Պողոսյանի նախագահությամբ հրապարակվեց ՀՀ երկրորդ նախագահ Ռոբերտ Քոչարյանի պաշտպանական թիմի բողոքի վերաբերյալ որոշումը: Դատարանը մերժեց Ռոբերտ Քոչարյանի նկատմամբ անձեռնմխելիության հիմքով քրեական հետապնդումը դադարեցնելը մերժելու դեմ ուղղված բողոքը:
Հիշեցնենք, որ դրանով պաշտպանները դատարանից պահանջում էին ճանաչել Ռոբերտ Քոչարյանի իրավունքների խախտումները:
Վերաքննիչ քրեական դատարանն ավելի վաղ անձեռնմխելիության հիմքով ազատ էր արձակել Ռոբերտ Քոչարյանին, սակայն մինչև այդ ակտի բեկանումը, այսինքն՝ Քոչարյանի կրկին կալանավորվելը, ըստ պաշտպանների, նրա հանդեպ մեղադրանքը պետք է հանվեր, ասել է թե՝ նա այլեւս չպետք է քրեական հետապնդման ենթարկվեր, բայց այդ ընթացքում եղել են դատավարական գործողություններ, կիրառվել է նոր խափանման միջոց՝ ստորագրությամբ երկրից չհեռանալու մասին: Պաշտպանական թիմի դիրքորոշմամբ՝ բոլոր այդ գործողությունները եղել են ոչ իրավաչափ:
Դատարանի այսօրվա որոշումը, որում բողոքի մերժման հիմնավորումները նշված չէին, կարող է բողոքարկվել սահմանված ժամկետում: Ռոբերտ Քոչարյանի պաշտպանները բողոքի որոշման հրապարակմանը ներկա չէին:
Կարդացեք նաև
Հիշեցնենք, որ ՀՀ երկրորդ նախագահ Ռոբերտ Քոչարյանը Մարտի 1-ի քրեական գործով մեղադրվում է ՀՀ սահմանադրական կարգի տապալման, նաեւ՝ խոշոր չափի կաշառք ստանալու համար: Նա կալանավորված է:
Լուիզա ՍՈՒՔԻԱՍՅԱՆ
