Նիկոլ Փաշինյանը Ստրասբուրգի եւ հարակից բնակավայրերի հայության հետ հանդիպման ժամանակ պատասխանելով իրեն ուղղված հարցերից մեկին՝ խոսեց Իսրայելի հետ հարաբերություններից, ասաց, որ ինչպես Իսրայելի, այնպես էլ բոլոր երկրների հետ շարունակելու են լավ հարաբերությունները: Հավելեց նաեւ, որ վերջերս նոր դեսպան է նշանակվել Իսրայելում:
Մի կին գրքեր նվիրեց Փաշինյանին, ասաց, որ առաջին անգամ է, որ սիրում է Հայաստանի ղեկավարին, ապա խնդրեց իր հետ սելֆի անել: Մի օրիորդի հետաքրքրում էին արտասահմանում ապրող ՀՀ քաղաքացի երիտասարդների բանակային խնդիրները:
Վարչապետն ասաց, որ հարցի լուծումը հեշտ չէ. «Հայաստանում կա մոտ 12000 հետախուզվող, որոնցից 11000-ը հետախուզվում է ժամկետային զինծառայությունից խուսափելու համար: Ուզում ենք այնպես լուծել խնդիրը, որպեսզի ճիշտ գտնվենք եւ մեր այն հայրենակիցների նկատմամբ, որոնք այս իրավիճակում են հայտնվել, եւ այն հայրենակիցների, որոնք իրենց քաղաքացիական պարտքը կատարել են եւ գնացել են բանակում ծառայելու»:
Նա կոչ արեց այն երիտասարդներին, որոնք այդ վիճակում են՝ գալ եւ ծառայել. «Դա հարցի ամենալավ լուծումն է…Երջանկություն է հայրենիք եւ պետություն ունենալը: Նաեւ շատ մեծ պատասխանատվություն է: Ես շատ կուզենայի, որ մարդիկ այդ պատասխանատվությունը վերցնեին: Օրինակ իմ տղան ծառայում է պաշտպանության բանակում: Կուզեի փակված համարել նաեւ այն էջը մեզ համար, որ մենք մտածում ենք, թե ոնց անենք, որ հայրենիքի նկատմամբ ունեցած պարտավորությունները չկատարենք»:
Կարդացեք նաև
«Բայց տղաներ կան, որ այստեղ են ծնվել, մենթալիտետի հարց կա, թեեւ մենք իրենց հայեցի ենք մեծացնում, բայց իրենք շփման խնդիր կունենան»,-ասաց հանդիպման մասնակիցներից մեկը: «Այսօր Հայաստանի բանակում մոտավորապես մի 100-150 զինվոր կա, որոնք հայերեն չեն հասկանում, հայերեն չեն հասկանում: Իրենք դրսում են ծնվել, բայց որոշել են գալ հայկական բանակում ծառայել»:
Գոհար ՀԱԿՈԲՅԱՆ
