Ինչպես արդեն տեղեկացրել ենք, Եվրոպայի խորհրդի խորհրդարանական վեհաժողովի (ԵԽԽՎ) գարնանային նստաշրջանի լիագումար նիստի ընթացքում ելույթ ունեցավ ՀՀ վարչապետ Նիկոլ Փաշինյանը
Լիտվացի պատվիրակ Վարեկիս Էգիդիլուսը Նիկոլ Փաշինյանին հիշեցրեց, որ ՀՀ-ն խնդիրներ ունի ոչ միայն Ադրբեջանի հետ, ինչպես վարչապետն ասաց, այլև մյուս հարևանների հետ: Եվ հետաքրքրվեց՝ ի՞նչ բարելավումներ կարելի է անել այս ասպարեզում: Այս առիթով Նիկոլ Փաշինյանն ասաց. «Մենք ունենք հարևաններ, հատկապես Վրաստանը և Իրանը, որոնց հետ մեր հարաբերություններն իսկապես բարձր մակարդակի վրա են գտնվում և մենք այդ երկրների հետ ունենք բարձր մակարդակի երկխոսություն: Փորձում ենք ավելի զարգացնել մեր հարաբերությունները: Ցավոք, Ադրբեջանի և Թուրքայի հետ մենք դիվանագիտական հարաբերություններ, ըստ էության, չունենք: Ադրբեջանի պարագան բոլորիս համար պարզ է, այլ է Թուրքիայի պարագան, քանի որ այդ դեպքում Թուրքիան ՀՀ-ի հետ հարաբերությունների հաստատումը կապում է Ադրբեջանի հետ մեր հարաբերություններով: Մենք ասել ենք՝ պատրաստ ենք Թուրքիայի հետ հարաբերություններ հաստատել առանց նախապայմանների: Ես արդեն ընդհանուր առմամբ ուրվագծեցի. մենք մեր հարաբերությունները Ադրբեջանի, մեր մյուս հարևանների հետ պատկերացնում ենք խաղաղության օրակարգի շրջանակներում»:
Գերմանացի պատվիրակ Աքսել Շիֆերը Նիկոլ Փաշինյանին հարցրեց՝ արդյոք այս պահին երկրում կա՞ն քաղաքական գործիչների նկատմամբ դատական գործեր, և դատավարությունն անկա՞խ է: Նիկոլ Փաշինյանն ի պատասխան ասաց. «Հեղափոխություն դատական համակարգում տեղի չի ունեցել: Մեր կառավարությունը դադարեցրել է ենթադրաբար գոյություն ունեցող պրակտիկան, երբ դատական համակարգն ուղղորդվում էր կառավարության կողմից: Լրիվությամբ հրաժարվել ենք այս գործելակերպից: Բայց չունեմ հարյուր տոկոսով վստահություն, որ այլ ազդեցության լծակները դատական համակարգի վրա չեն պահպանվել: Չունեմ համոզվածություն, որ մեր դատական համակարգում կոռուպցիա չկա: Ընդամենը տասն օր առաջ ՀՀ-ում դատավոր է ձերբակալվել կաշառք ստանալու պահին»:
Միացյալ Թագավորությունը ներկայացնող պատվիրակ Ջոն Հովելը նկատեց՝ Իրանը Եվրոպայի հետ տարբերվող հարաբերություններ ունի, և ինչպե՞ս է ՀՀ-ն Իրանի հետ համագործակցում Եվրոպայի հետ համագործակցության համատեքստում: Նիկոլ Փաշինյանը հայտարարեց. «Եվրոպայի ներկայացուցիչների, բարձրաստիճան պաշտոնյաների հետ ունեցած շփումներում արձանագրել եմ, որ եվրոպացի մեր գործընկերները հասկանում են հայ-իրանական հարաբերութունների կարևորությունը և համաձայն են Իրանի հետ բնականոն հարաբերությունները պահպանելու՝ մեր տեսլականի հետ: Բարդ վիճակում ենք, քաղաքական հակասությունների երկու կողմերում մեր բարեկամներն են: Երկխոսությունը միակ ճանապարհն է, որով 21-րդ դարում հարիր է, որ մենք մտածենք խնդիրների լուծման մասին»:
Կարդացեք նաև
Սլովենիան ներկայացնող պատվիրակ Վիոլետա Տոմիչը հիշեցրեց՝ անցյալ տարվա նոյեմբերին ԼԳԲՏ ակտիվիստների համաժողովը Երևանում չեղյալ հայտարարվեց, քանի որ մի շարք հանրային վստահություն ունեցող մարդիկ դեմ են արտահայտվել, ատելության խոսք հնչեցրել: Այնուհետև հարցրեց՝ ի՞նչ կարելի է անել, որ ՀՀ-ում ԼԳԲՏ հանրությունը զգա, որ իր մարդկային հիմնարար իրավունքները պաշտպանված են: Նիկոլ Փաշինյանն արձագանքեց. «Ես ասացի, որ ՀՀ-ում օրենքի գերակայություն է, բոլոր քաղաքացիներն ունեն նույն իրավունքներն ու պարտավորությունները: Ձեր ասած դեպքի մասին լսել եմ, գիտեմ, չեմ կարող, անկեղծ ասած, ասել պատճառները, թե ինչու է նման միջոցառումը չեղարկվել, ինչու կամ երբ է պլանավորվել և դա ինչ միջոցառում է: Այդ խնդրին տեղյակ եմ միայն սոցցանցերում արված մեկ- երկու գրառման շրջանակում: Վախենամ՝ բավարար խորությամբ չեմ տիրապետում, որ առավել մանրամասն պատասխան տամ»:
Տաթև ՀԱՐՈՒԹՅՈՒՆՅԱՆ
