Գործարարը հակադարձում է ԱԺ փոխխոսնակ Ալեն Սիմոնյանին եւ նրա օրենսդրական նախաձեռնությունը անհիմն համարում:
«Ասում են՝ բուքմեյքերական գրասենյակներում կազմակերպվող վիճակախաղերն ավելի գայթակղիչ են, քան ինտերնետ հարթակում: Այդպես չէ, իրական պատկերն այլ է»,-այսօր այս մասին «Բլից ինֆո» ակումբում ասաց «Գուդվին-Բետ» ՍՊԸ-ի տնօրեն Սարգիս Միքայելյանը: Նրա ներկայացմամբ՝ անձը եթե այցելում է գրասենյակ խաղադրույք կատարելու, նրան ժամանակ է առաջարկվում, եւ անձը հաստատող փաստաթուղթ, իսկ համացանցում խաղադրույքներ կատարելիս, նախ պարզապես հաշիվ են բացում եւ չի վերահսկվում՝ անչափահասն է, թե չափահասն է խաղադրույք անում:
Միքայելյանն անդրադառնալով, որ բուքմեյքերական գրասենյակների առկայության պատճառով գայթակղությունը մեծանում է խաղադրույքներ կատարելու, ասաց. «Եթե այդպես է, ինչո՞ւ այս ոլորտում շրջանառվող գումարը 4-5 անգամ շատ է, քան բուքմեյքերական գրասենյակներում»:
Բուքմեյքերական գրասենյակի տնօրենը նաեւ ասաց. «Ես որպես ՀՀ քաղաքացի, որպես հայ մարդ, որպես հայկական ընտանիքում դաստիարակված մարդ, չեմ քարոզում խաղամոլություն եւ շատ վատ եմ նայում դրան: Բայց այն օրենքի նախագիծը, որ առաջարկում է Ալեն Սիմոնյանը, խաղամոլության դեմ որեւիցե հարց չի լուծում: Հակառակը՝ 1345 մարդու գործազրկություն է առաջանալու եւ բյուջեից միլիարդավոր դրամներ կրճատվելու են»:
Կարդացեք նաև
Մանրամասն՝ տեսանյութում
Օրենսդրական նախագծով առաջարկվում է բուքմեյքերական գրասենյակները տեղափոխել Երեւանից դուրս զբոսաշրջային 4 քաղաքներ, ինչը, ըստ Միքայելյանի, տնտեսվարողին ձեռնտու չէ. «Մենք առաջարկում ենք ավտոմատացված սարքավորումներով ամեն քաղաքում մեկական կետեր լինեն, իսկ Երեւանում ամեն համայնքում երկուական կետեր»:
Ալեն Սիմոնյանի մեկ այլ մտքին՝ բուքմեյքերական գրասենյակում 100-200 մարդ է աշխատում, Միքայելյանն արձագանքեց՝ 496 աշխատող կա, 2018-ին պետական բյուջե 1 մլրդ դրամ է վճարել:
Մանրամասն՝ շուտով տեսանյութում
Շահումով խաղերի հետեւանքով երիտասարդներ, ընտանիքներ են կործանվում, մարդիկ զրկվում են իրենց գույքից, այսպիսի հիմնավորումներ են հնչում. մեր այս դիտարկմանն ի պատասխան՝ գործարարն ասաց. «Ասում են՝ ընտանիքներ են կործանվում, ինքնասպանության դեպքեր են լինում. արդյոք ունե՞ն վիճակագրություն, որ այս երեւույթն առաջանում է բուքմեյքերական գրասենյակներում խաղադրույքներ անելով, այլ ոչ թե ինտերնետում: Համոզված եմ՝ չկա վիճակագրություն, ենթադրում եմ՝ ավելի շատ տեղի են ունենում ինտերնետ տիրույթում մասնակցելուց»:
Ըստ գործարարի, այս նախագծով փորձում են օրենքով մենաշնորհ ստեղծել:
Մանրամասն՝ տեսանյութում
Միքայելյանը որոշել է գազալցակայաններից խաղային սարքերը տեղափոխել գրասենյակներ, դրանք թեեւ օրինական են, բայց վարչապետի հորդորին է հետեւում:
Հարցին՝ ինչ կարծիք ունի գործարարը պատգամավոր Հրաչյա Հակոբյանի մտահղացման մասին՝ լրատվամիջոցներում եւ այլուր սահմանափակել խաղատների եւ վիճակախաղերի գովազդը, Միքայելյանը պատասխանեց՝ համացանցում գովազդները միանշանակ պետք է սահմանափակվեն: Գործարարը կողմ է Հակոբյանի առաջարկին:
Նելլի ԲԱԲԱՅԱՆ
