Ավտոմաքսատունը Գյումրի տեղափոխելու վարչապետ Փաշինյանի հանձնարարականի վերաբերյալ այսօր ՊԵԿ ղեկավար Դավիթ Անանյանը կառավարության նիստից հետո լրագրողների հետ զրույցում ասաց. «Ավտոմաքսատունը Գյումրի տեղափոխելու վերաբերյալ հանձնարարականի հետ կապված ես առանձին քննարկում եմ ունեցել վարչապետի հետ, ինձ վարչապետն ասել է՝ քննարկեք մաքսատունը Գյումրի տեղափոխելու հնարավորությունը»:
Ըստ պարոն Անանյանի, որոշակի ժամանակ հետո ՊԵԿ-ը վարչապետին ներկայացնելու է իրենց տեսլականը. «Կարող է չսահմանափակվենք Գյումրիով: Հնարավոր է՝ երեք դիսլոկացիոն այդպիսի պրոֆեսիոնալ մաքսատների բացման առաջարկ անենք, որը կապված կլինի եւ լոգիստիկայի հետ, եւ նաեւ տարբեր տարածաշրջանների տնտեսական ակտիվությունը զարգացնելու հետ»:
Պարոն Անանյանին լրագրողները փոխանցեցին մասնագետների տեսակետը, որ մաքսատունը Գյումրի տեղափոխելով կբարդացվի աշխատանքը, ՊԵԿ ղեկավարն ի պատասխան ասաց. «Տեսակետ կա ինչի՞ վերաբերյալ, որ ինձ հանձնարարվել է տեսնել՝ դրա հնարավորությունը կա՞, թե՞ ոչ»:
Կարդացեք նաև
Հիշեցնենք, որ վարչապետը Դավիթ Անանյանին նման հանձնարարություն էր տվել «Նորագավիթ» ավտոտրանսպորտային միջոցների ձեւակերպումների մաքսակետում շրջայցից հետո:
Լուսինե ԲՈՒԴԱՂՅԱՆ
