Թուրքիայի պաշտոնական շրջանակներում կոշտ արձագանք են տվել երեկ Իտալիայի Պատգամավորների պալատի կողմից Հայոց ցեղասպանությունը դատապարտող նախաձեռնության ընդունմանը:
Մասնավորապես, Թուրքիայի արտգործնախարարը Իտալիայի խորհրդարանի այդ քայլն անվանել է պատմությունն աղավաղելու փորձ:
«Ինչպես պատմությունը քաղաքականացնելու բոլոր փորձերը, Իտալիայի Պատգամավորների պալատնի այս որոշում նույնպես իրենից արժեք չի ներկայացնում: Անընդունելի է, որ Իտալիայի խորհրդարանը գործիք է դարձել քսենոֆոբիկ «Լեգա» կուսակցության ձեռքում»,- Twitter-ի իր էջում գրել է Չավուշօղլուն:
Թուրքիայի նախագահի խոսնակ Իբրահիմ Քալընը կարծում է, որ այդ նախաձեռնությամբ Իտալիան անտեսում է պատմական ճշմարտությունը։
Կարդացեք նաև
«Իտալիայի խորհրդարանի այսպես կոչված ցեղասպանության բանաձևն անտեսում է պատմական ճշմարտությունը և նոր թշնամանքի սերմեր գցում: Մենք խստորեն մերժում ենք այդ մոտեցումը, որն անտեսում է համատեղ պատմական հանձնաժողով ստեղծելու մեր նախագահի կոչը և առաջ բերում քաղաքական պոպուլիզմ»,- ասվում է Քալընի թվիթերյան գրառման մեջ:
Իտալիայի խորհրդարանի նախաձեռնությանն արձագանքել է նաև Թուրքիայի նախագահի աշխատակազմի հանրային կապերի բաժնի ղեկավար Ֆահրեթթին Ալթունը՝ մասնավորապես գրելով. «Մենք խստորեն դատապարտում ենք Իտալիայի խորհրդարանի վերջին փորձը՝ մեր ազգի պատմությունը աղավաղելու և քաղաքականացնելու ուղղությամբ: Դա անարդյունավետ է, թշնամական և ցավալի: Միմյանց հիշողությունների վրա հարձակումներ անելու փոխարեն մենք պետք է աշխատենք միասին, որպեսզի ճշմարտությունը հաղթի հորինվածին»,- գրել է Թուրքիայի նախագահականի աշխատակազմի հանրային կապերի բաժնի ղեկավար Ֆահրեթթին Ալթունը:
Հիշեցնենք, ապրիլի 10-ին Իտալիայի Պատգամավորների պալատը 382 կողմ ձայներով (432 պատգամավորներից) ընդունեց նախաձեռնություն, որով կոչ է անում Իտալիայի կառավարությանը ճանաչել Հայոց ցեղասպանությունը և տալ միջազգային հնչեղություն:
2000թ. նոյեմբերի 16-ին Իտալիայի պատգամավորների խորհուրդն ընդունել էր Ցեղասպանությունը դատապարտող որոշում:
Պատրաստեց՝ Վիկտորյա ԱՆԴՐԵԱՍՅԱՆԸ
