Եվրոպայի խորհրդի խորհրդարանական վեհաժողովը (ԵԽԽՎ) մտահոգություն է հայտնել ատելության խոսքի տարածման վերաբերյալ, որը խթանում է խտրականությունը, ռասայական ատելությունը, հակասեմականությունը, իսլամաֆոբիան և անհանդուրժողականությունը, և որը հիմնականում թիրախավորում է փոքրամասնություններին, ներգաղթյալներին, կանանց և ԼԳԲՏԻ անձանց: Այս մասին ասվում է ԵԽԽՎ տարածած հայտարարության մեջ:
Այս մտահոգիչ միտումից զերծ չէ նաև քաղաքական ասպարեզը, և ատելության խոսքն օգտագործվում է «ոչ միայն պոպուլիստական և ծայրահեղական խմբերի, այլև քաղաքական շրջանակի ներկայացուցիչների կողմից», ասվում է հայտարարության մեջ: Քաղաքական գործիչներն ունեն քաղաքական պարտականություն և բարոյական պատասխանատվություն`«զերծ մնալ ատելության խոսքից և պիտակավորող բառապաշարից, ինչպես նաև անհապաղ և միանշանակ դատապարտել դրա օգտագործումն ուրիշների կողմից, քանի որ լռությունը կարող է մեկնաբանվել որպես դրա հաստատում կամ աջակցություն», ասվում է փաստաթղթում:
Վեհաժողովը խրախուսել է կուսակցություններին և շարժումներին ընդունելու ինքնակարգավորվող գործիքներ, ինչպիսիք են վարքագծի կանոնները և էթիկայի խարտիաները՝ արգելելով ատելության խոսքի օգտագործումն իրենց անդամների կողմից: «Ինտերնետային տարածությունը, մասնավորապես, սոցիալական ցանցերը, նույնպես պետք է կիրառեն ինքնակարգավորվող գործիքներ, ատելության խոսքի կանխարգելման և պատժամիջոցների կիրառման համար և պարտավորեցնել հեռացնել վիրավորական գրառումները»,- ասվում է փաստաթղթում:
ԵԽԽՎ-ն նաև կոչ է արել անդամ-պետություններին ընդունել վարչական, քաղաքացիական և քրեական իրավունքի դրույթներ ատելության խոսքին դիմակայելու համար և խթանել իրազեկվածության բարձրացմանն ուղղված գործողություները, այդ թվում միջազգային մակարդակներում:
Կարդացեք նաև
Ի վերջո, Վեհաժողովը կոչ է արել անդամ-պետություններին իրականացնել Ռասիզմի եւ անհանդուրժողականության դեմ պայքարի եվրոպական հանձնաժողովի 15-րդ ընդհանուր քաղաքականության հանձնարարականը, որը պարունակում է մի շարք միջոցներ ատելության խոսքի կանխարգելման և դրան դիմակայելու ուղղությամբ:
Պատրաստեց՝ Վիկտորյա ԱՆԴՐԵԱՍՅԱՆԸ
