ՀՀ Սահմանադրական դատարանի դատավորի թեկնածու Գոռ Հովհաննիսյանն այսօր ԱԺ-ում փակ հանդիպմանը մասնակցեց ԲՀԿ խմբակցության պատգամավորների հետ:
Լրագրողների հետ զրույցում Գոռ Հովհաննիսյանը վստահեցրեց, որ որեւէ քաղաքական ուժի հետ երբեւէ իր թեկնածության հարցը չի քննարկել. «Որեւէ քաղաքական ուժի չեմ դիմել՝ ինձ աջակցելու համար: Իմ թեկնածության համար որեւէ հարց չեմ քննարկել: Եթե ավելի պարզ ասեմ, ընդամենը Բեռլինից մի էլեկտրոնային նամակ եմ ուղարկել նախագահին, եւ հարցն ընթացել է իր հունով»:
Հիշեցնենք, որ ՍԴ անդամի պաշտոնում ՀՀ նախագահն առաջադրել է Գոռ Հովհաննիսյանի թեկնածությունը, ԱԺ-ն էլ առաջիկայում պետք է քվեարկի:
Գոռ Հովհաննիսյանը նշեց, որ որեւէ քաղաքական ուժի կամ կուսակցության հետ երբեւէ որեւէ կապ չի ունեցել. «Եթե որեւէ մեկը գովելով կամ քննադատությամբ է ներկայացրել ինձ, դա այդ ուժի կամ մարդու մասնավոր կարծիքն է, եւ ինձ հետ կապ չունի՝ անկախ նրանից, թե ով ինչպես է արտահայտվել իմ մասին»:
Կարդացեք նաև
Հավելենք, որ ՍԴ անդամի թեկնածուն առաջիկայում փակ հանդիպումներ կունենա նաեւ մյուս խմբակցությունների պատգամավորների հետ:
Լուիզա ՍՈՒՔԻԱՍՅԱՆ
