Ինչպես տեղեկացրել ենք, այսօր ԱԺ պաշտպանության եւ անվտանգության հարցերի հանձնաժողովի նիստում քննարկվեց «Զինվորական ծառայության եւ զինծառայողի կարգավիճակի մասին» օրենքում փոփոխություն եւ լրացում կատարելու նախագիծը: Այն ներկայացրեց ԲՀԿ պատգամավոր, ԱԺ փոխխոսնակ Վահե Էնֆիաջյանը: Նախագծով առաջարկվում է, որ 18 տարեկանները չանցնեն մարտական հերթապահության, դա անեն փորձառուները: Ներկայումս 5 ամիս պատրաստվածություն ձեռքբերելուց հետո նոր միայն զինծառայողները կարող են մարտական հերթապահության անցնել, ըստ նախագծի, այդ ժամկետը պետք է երկարացնել 7 ամսով եւ դարձնել 1 տարի:
Հանձնաժողովի նախագահ Անդրանիկ Քոչարյանն ասաց. «Ամեն մի զինվորի կյանքը պարզ է, որ բոլորիս համար մեծ արժեք է: Հրեաները լավ ասացվածք ունեն՝ ով փրկում է մի կյանք, նա փրկում է աշխարհը: Այդ մի կյանքի մեջ է ամփոփվում ամեն ինչ: Այդ տրամաբանության մեջ ամեն մի ինքնասպանություն շատ խորքային խնդիրների առկայությունն է: Ինքնասպանությունները ես համարում եմ ամենաահավորը, դժբախտ պատահարները դեռ կարելի է հասկանալ, կարող է անփորձ վարորդ լինի եւ այլն: Կոռուպցիայի հարցերը դեռ կարող ենք լուծել, բայց բանակում պետք է լինի այնպիսի եղբայրություն, այդ եղբայրությունն է պատերազմի ժամանակ հաղթել եւ հաղթելու: Բայց եղբայրությունը ախպերություն չի, ախպերությունը մենք արմատախիլ ենք անելու, որովհետեւ ախպերության դրսեւորումներ մենք տեսանք նաեւ Մեղրիի դեպքերում: Դա արմատացած երեւույթ է, որ պետք է չեզոքացնել»:
Պատգամավորներն առաջարկում էին դպրոցներում ռազմագիտության դասերը խորացնել, ոչ թե մարտական հերթափոխի տրամաբանությունը փոխել:
Կարդացեք նաև
«Լուսավոր Հայաստան» խմբակցության քարտուղար Գեւորգ Գորգիսյանն ասաց, որ իրեն բացարձակ դուր չի գալիս, երբ 18 տարեկանների մասին խոսում են այնպես, ասես երեխաներ լինեն ու գտնում են, որ մարտական հերթապահության չպետք է գնան. «Քիչ է մնում երեխա անվանենք ու խոսում ենք այն տոնով, կարծես արդեն պիտի խոսենք նրանց տակը փոխելու մասին: 18 տարեկանները հասուն տղամարդիկ են, Իսրայելում 17 տարեկանից են բանակ գնում եւ դրանից բնավ չի տուժում բանակի լրջությունը»:
Ինչպես արդեն հայտնել ենք, նախագիծը բացասական եզրակացություն ստացավ հանձնաժողովում:
Հռիփսիմե ՋԵԲԵՋՅԱՆ
