«20 օրում պետք է մեքենան մաքսազերծված լինի, եթե փաստաթղթերի հետ խնդիր չկա»,-այսօր «Նորագավիթ» մաքսատանը կատարած շրջայցից հետո ասաց Նիկոլ Փաշինյանը: Վարչապետն այսօր ծանոթացավ ավտոտրանսպորտային միջոցների մաքսային ձեւակերպումների ընթացակարգին, քաղաքացիների հետ հերթ կանգնեց ու սպասեց, մինչեւ որ ավտոմեքենայի ձեւակերպումներն անեն՝ տեսնելու, որքան ժամանակում է կատարվում մաքսազերծումը:
Փաշինյանը նաեւ վարորդներին հարցուփորձ արեց՝ մաքսակետում ինչ խնդիրների են հանդիպում:
Կարդացեք նաև
Քաղաքացիներից ոմանք դժգոհեցին ավտոմեքենաները «ինվոյսով» մաքսազերծելու խնդրից՝ նշելով, որ իրենք մեքենան էժան ձեռք են բերում, բայց մաքսայինը իրենց չի հավատում եւ մաքսազերծում է այնպիսի գներով, որ ավելի լավ է ավտոմեքենան նվեր տան ՊԵԿ-ին:
Նիկոլ Փաշինյանն ասաց, որ «ինվոյսների հարցը» ամենամեծ հարցն է. «Դեպք է լինում, որ գալիս են «ինվոյս» են ցույց տալիս՝ 100, 200 դոլարով, 300 դոլարով մեքենա են առել եւ մաքսային ծառայությունը կասկածում է: Մի քիչ էլ կուլտուրայի հարց է: Այն, որ քաղաքացին մաքսայինին պետք է խաբի, մաքսայինն էլ քաղաքացուն, դա, ոնց որ ավանդույթ է եղել, մինչեւ այդ ավանդույթից դուրս գանք՝ ժամանակ է պետք»:
Ըստ վարչապետի 200-300 դոլարով ամեն օր հազարավոր մեքենաներ ենք ներկրում, հետո՝ ասում ենք՝ «վայ, խցանումներ են, վայ, վթարներ են». «Այսինքն՝ ինչ, Հայաստանը մեքենաների գերեզմանո՞ց է»:
Մանրամասները՝ տեսանյութում
Լուսինե ԲՈՒԴԱՂՅԱՆ
