Ինչպես արդեն տեղեկացրել ենք՝ Ստրասբուրգում անցկացվում է Եվրոպայի խորհրդի խորհրդարանական վեհաժողովի (ԵԽԽՎ) գարնանային նստաշրջանը:
Լիագումար նիստի ընթացքում ԵԽԽՎ նախագահ Լիլիան Մորի-Պասքիեն ուրախությամբ նշեց, որ Երևանում բացվել է Եվրոպայի հրապարակ, որի բացման արարողությանը մասնակցել է նաև ինքը:
Լիլիան Մորի Պասքիեն հիացմունքով խոսեց Հայաստանում ժողովրդավարության ճանապարհին գրանցված առաջընթացի վերաբերյալ: Նա հայտարարեց. «Երբ խոսում ենք «ճարտարապետության» մասին, պետք է նշել, որ այն կենտրոնացած է նախ Եվրոպայի խորհրդում, այնուհետ ԵՄ-ում, Շենգենյան տարածքում ու եվրոյի գոտում։ 47 անդամ երկրները ձևավորում են այն շրջանակը, որն անվանում ենք ընդհանուր եվրոպական տուն՝ 830 միլիոն մարդկանց համար, որոնք կառավարվում են ընդհանուր իրավական դաշտով, որը պաշտպանում է անհատին կամայական որոշումներից, սահմանում մեր հիմնարար իրավունքներն ու ԵԽԽՎ ազատությունները»:
ԵԽԽՎ նախագահը անդրադարձավ նաև ԵԽԽՎ-ում Վրաստանի և Հայաստանի վարչապետերի հյուրընկալմանը: Հիշեցնենք՝ ապրիլի 11-ին Ստրասբուրգում՝ Եվրոպայի պալատում, կբացվի «Հայաստանի թավշյա հեղափոխությունը» խորագրով ցուցահանդեսը: Ապրիլի 11-ին ԵԽԽՎ-ում ելույթ կունենա ՀՀ վարչապետ Նիկոլ Փաշինյանը:
Կարդացեք նաև
ԵԽԽՎ նախագահն այս առիթով ասաց. «Այս շաբաթ մենք կհյուրընկալենք Վրաստանի և Հայաստանի վարչապետերին: Հայաստանը կազմակերպությանը միացել է 20 տարի առաջ, բայց նշանակալից առաջընթաց է գրանցել ժողովրդավարական բարեփոխումների ճանապարհին»:
Երկու վարչապետերի ելույթները Վեհաժողովում ոչ միայն հնարավորություն են քաջալերելու սերտ համագործակցություն, նաև մեզ բոլորիս համար է հնարավորություն հիշել մեր պարտավորությունները և աջակցել ժողովրդավարական ինստիտուտների զարգացմանը և պաշտպանել մեր երկրներում մարդու իրավունքների և ազատությունների իրականացմանը»:
Տաթև ՀԱՐՈՒԹՅՈՒՆՅԱՆ
