ՀՀ վերաքննիչ դատարանում այսօր ավարտվեց ԵՄԿ նախկին նախագահ, ԱԺ նախկին պատգամավոր գեներալ-մայոր Մանվել Գրիգորյանի խափանման միջոցի հայցի քննարկումը: Դատարանը գնաց խորհրդակցական սենյակ, վճիռը կհրապարակվի ապրիլի 10-ին, ժամը 14.30-ին: Այդ մասին, Aravot.am-ի հետ զրույցում ասաց Մանվել Գրիգորյանի պաշտպաններից Արսեն Մկրտչյանը:
Հիշեցնենք, Մանվել Գրիգորյանի պաշտպանները բողոքարկում են իրենց պաշտպանյալին կալանքի տակ պահելու հարցը, քանի որ գտնում են, որ Մանվել Գրիգորյանին կալանքի տակ պահելը անհամատեղելի է նրա հիվանդությունների հետ եւ Մանվել Գրիգորյանի հետ կատարվողը համարում են «դասական խոշտանգում»:
Մանվել Գրիգորյանի պաշտպաններից Լեւոն Բաղդասարյանն էլ Aravot.am-ի հետ զրույցում ասաց, որ հույս չեն փայփայում, որ վերաքննիչ դատարանը կբեկանի նախորդ ատյանների դատարանների`իրենց պաշտպանյալին կալանքի տակ պահելու որոշումը: Լեւոն Բաղդասարյանը հիշեցնում է, ինքը նախկինում էլ հայտարարել է, որ այս գործով Հայաստանում ընտրանի արդարադատություն է իրականացվում: Ցավում է, որ պատասխանատվությունը կրկին ընկնելու է Հայաստանի հանրապետության վրա, քանի որ Մանվել Գրիգորյանի գործի կալանքի դրվագով գործը գտնվում է ՄԻԵԴ-ում:
Նելլի ԳՐԻԳՈՐՅԱՆ
