«Մեզ չի թվում, որ արդարություն կա: Սա արդարություն չէ: Միայն կալանքի միջոցով են կարողանում իրենց հարցերը լուծել»,-լրագրողների հետ զրույցում այսօր կալանավայր տեղափոխվելուց առաջ դատարանում հայտարարեց «Սպայկա» ընկերության տնօրեն Դավիթ Ղազարյանը:
Հիշեցնենք, որ նա մեղադրվում է հարկային պարտավորությունների կատարումից չարամտորեն խուսափելու համար: Աշխատակիցներն առավոտից բողոքի գործողություններ են իրականացնում՝ բողոքելով նրա կալանավորվելու դեմ:
«Քանի որ քննիչն ի սկզբանե միջնորդել էր ինձ կալանավորել, ես սպասում էի դատարանի այս որոշմանը: Քննարկում է եղել, քննիչը չէր կարող միայնակ նման որոշում կայացնել»,-համոզմունք հայտնեց Դավիթ Ղազարյանը:
President of ‘Spayka’ company was detained
Նրա շահերի պաշտպան, փաստաբան Կարեն Սարդարյանը լրագրողներին տեղեկացրեց՝ նախաքննական մարմնի հիմնավորումն այն է եղել, որ հեղինակություն վայելող Դավիթ Ղազարյանը, լինելով ազատության մեջ, կարող է անօրինական ներգործություն ունենալ վկաների վրա. «Բայց նրանք անգամ հարցաքննված չեն, չկա որեւէ փաստ: Այսինքն, եթե հարգանք վայելող մարդ ես, ուրեմն քո համար միայն մեկ խափանման միջոց կա՞, կալա՞նք»:
Կարդացեք նաև
Պաշտպանը տեղեկացրեց, որ այս պահին Դավիթ Ղազարյանի դեմ ցուցմունք չկա, փոխարենը՝ կա մեկ հաշվապահական եզրակացություն, որից պաշտպանական կողմը եւ տնօրենը տեղյակ չեն եղել. «Ներկայացրել ենք գրավի դիմաց ազատ արձակելու միջնորդություն, որը մերժվել է: Դավիթ Ղազարյանը ցուցմունք չի տվել: Նա ասում է, որ եթե ընկերությունն ունի պարտավորություն, պատրաստ է այն կատարել, եթե հարցը քննարկվի եւ հաստատվի մասնագետների կողմից: Այսինքն՝ եթե կհամոզեն, որ պարտք ունենք, մենք կվճարենք: Եթե ոչ, վիճարկելու դատական կարգ գոյություն ունի»:
Լուիզա ՍՈՒՔԻԱՍՅԱՆ
