Այսօր՝ ապրիլի 8-ին, Ստրասբուրգում մեկնարկեց Եվրոպայի խորհրդի խորհրդարանական վեհաժողովի (ԵԽԽՎ) գարնանային նստաշրջանը:
Լիագումար նիստի ընթացքում վեհաժողովը քննարկեց Մոլդովայում խորհրդարանական ընտրությունների ուսումնասիրության արդյունքները, առաջընթացի զեկույցը:
Վեհաժողովն իր աշխատանքների ընթացքում կքննարկի ԵԽ բյուջետային ճգնաժամի հարցը: Նշենք, որ այսպիսի իրավիճակ է առաջացել Ռուսաստանի կողմից անդամավճար չվճարելու պատճառով: 2017 թ. հունիսից Ռուսաստանը դադարեցրել է Եվրախորհրդի բյուջե վճարումներ կատարել: 2019 թվականի սկզբի տվյալներով՝ այդ պարտքը կազմում է մոտ 60 մլն եվրո: Ընդհանուր առմամբ, Ռուսաստանի Դաշնության ներդրումային բաժինը կազմում է Եվրոպայի խորհրդի ամենամյա բյուջեի 11% -ը (մոտ 30 մլն եվրո): Եվրոպայի խորհրդի կանոնադրության համաձայն, եթե մինչև հունիս Ռուսաստանը չկատարի իր ֆինանսական պարտավորությունները, կարող է զրկվել ներկայացուցչական իրավունքից:
Ապրիլի 10-ին ԵԽԽՎ-ում կհյուրընկալվի Վրաստանի վարչապետ Մամուկա Բախտաձեն, իսկ հինգշաբթի՝ ապրիլի 11-ին, ՀՀ վարչապետ Նիկոլ Փաշինյանը:
Կարդացեք նաև
Գարնանային նստաշրջանի ընթացքում տարեկան զեկույց կներկայացնի Եվրոպայի խորհրդի մարդու իրավունքների հարցերով հանձնակատար Դունյա Միյատովիչը: ԵԽ գլխավոր քարտուղար Թորբյորն Յագլանդը ելույթ կունենա վեհաժողովում:
Ապրիլի 8-ի լիագումար նիստի ընթացքում, երբ ԵԽԽՎ-ն քննարկում էր առաջընթացի զեկույցը, ելույթով հանդես եկավ ԵԽԽՎ-ում ադրբեջանական պատվիրակության ղեկավար Սամադ Սեիդովը: Նա մտահոգություն հայտնեց, թե ինչու է ԵԽԽՎ-ն ընտրողական մոտեցում ցուցաբերում և առաջընթացի զեկույցում Ադրբեջանի մասին միայն քննադատական հարցեր է ներառում՝ չտեսնելով դրականը, որ Ադրբեջանում կատարվում է: Այնուհետև սկսեց մեղադրել հայ պատվիրակներին ատելության խոսքի տարածման մեջ: Նա հայտարարեց. «Մեր տարածաշրջանում շատ բան է փոխվում, միայն չեն փոխվում մեր հայ գործընկերների ատելության խոսք պարունակող ելույթները: Առաջարկում եմ սա քննարկման առարկա դարձնել առաջիկայում մեր աշխատանքների ընթացքում այս թեմայով քննարկման ընթացքում»:
Այնուհետև անդրադարձավ առաջընթացի զեկույցին և նշեց. «Ադրբեջանում շատ դրական տեղաշարժեր կան, պետք է դրանք էլ արձանագրվեն առաջընթացի զեկույցում, ինչը չի արվում: Օրինակ՝ Իլգար Մամադովն ազատ է արձակվել, ինչի մասին որևէ նշում չկա զեկույցում: Ադրբեջանում 61-ից ավելի մարդ է ազատ արձակվել, որոնց մասին մշտապես խոսվել է այս Վեհաժողովում: Մեկ շաբաթ առաջ Ադրբեջանի նախագահ Իլհամ Ալիևը ստորագրել է Ադրբեջանում իրավական բարեփոխումներ անցկացնելու մասին որոշում: Այս թվարկածս բարեփոխումներից և ոչ մեկի մասին որևէ բան ամրագրված չէ առաջընթացի զեկույցում»:
Ելույթն ավարտելով՝ ադրբեջանցի պատվիրակը Վեհաժողովին կոչ արեց ընտրողական մոտեցում չցուցաբերել և տեսնել նաև այն առաջընթացը, որը կա Ադրբեջանում:
Տաթև ՀԱՐՈՒԹՅՈՒՆՅԱՆ
