Մարդու իրավունքների պաշտպան Արման Թաթոյանն այսօր լրագրողների հետ զրույցում անդրադառնալով ՀՀ վարչապետ Նիկոլ Փաշինյանի գրառմանը, թե իր ցուցումով քրեական գործ են հարուցել իր մերձավոր ազգականի նկատմամբ, ասաց, որ վարչապետի ցուցումով չի կարող գործ հարուցվել: Դա կարող է անել դատախազությունը:
Ինչպե՞ս է արձագանքում վարչապետը Նիկոլ Փաշինյանի հայտարարությանը: «Ապրի Մարդու իրավունքների պաշտպանը, թող ինձ տանեն, դատապարտեն, նստացնեն…»,- լրագրողներին ասել է պրն Փաշինյանը:
Արման Թաթոյանը ֆեյսբուքյան իր էջում արձագանքել է.
«Այսօր Ազգային ժողովում պատասխանել եմ լրագրողների հարցերին, որոնցից մեկը վերաբերում էր քրեական գործ հարուցելու ցուցում տալու իրավասությանը։
Կարդացեք նաև
Ընդգծում եմ ևս մեկ անգամ, որ Մարդու իրավունքների պաշտպանն անկախ է և իր գործունեությունն իրականացնում է բացառապես Սահմանադրության ու օրենքների հիման վրա՝ իրավունքի գերակայությամբ:
Մարդու իրավունքների պաշտպանի խոսքերը չեն կարող ունենալ որևէ քաղաքական երանգ կամ ենթատեքստ, և իմ պատասխանն այդ հարցին եղել է բացառապես իրավական բնույթի և հստակ, բխել է օրենքից:
Դրան քաղաքական ենթատեքստ տալը, կոնտեքստից դուրս ներկայացնելը կամ շահարկելը համարում եմ անթույլատրելի։
Հ.Գ. Քիչ առաջ նկատեցի Վարչապետի երկրորդ գրառումը, որը, կարծում եմ, հստակեցնում է հարցը։ Հուսամ՝ լրագրողների համար էլ ամեն ինչ պարզ դարձավ»:
