«Մենք այսօր ունեցել ենք ժողով, ես ասել եմ՝ ընկերությունը պետք է աշխատի իր բնականոն հունով, եթե ինձ կալանավորեն»,-այս մասին այսօր ասաց «Սպայկա» ընկերության տնօրեն Դավիթ Ղազարյանը՝ լրագրողների հետ հանդիպմանը:
Դատարանն այսօր պետք է որոշի նրան կալանավորելու՝ ՊԵԿ-ի քննչական վարչության միջնորդության հիման վրա:
«Սպայկա» ընկերությունը կասկածվում է խոշոր չափերի՝ 7 միլիարդ դրամ հարկերից խուսափելու համար: Ղազարյանն այս գործը շինծու է համարում:
Ղազարյանն ասաց, որ սկսված քրեական հետապնդման պատճառով Եվրասիական զարգացման բանկը կասեցրել է ֆինանսավորումը, որով նախատեսվում էր 100 միլիոն դոլարի ներդրում անել եւ մոտ 1000 աշխատատեղ բացել:
Կարդացեք նաև
Հիմա, ըստ Ղազարյանի, ընկերության աշխատանքը հարցականի տակ է, առավելեւս գյուղացիներից գյուղմթերքների մթերման հարցը. «Մենք այսօր ունեցել ենք ժողով, ես ասել եմ՝ ընկերությունը պետք է աշխատի իր բնականոն հունով, եթե ինձ կալանավորեն: Քննարկվել է նաեւ մթերումների հարցը: Դիմացը ծիրանն է, էլ չեմ ասում կաթը, որ պետք է ծավալները մեծացնեինք մինչեւ մայիս: Ես ասել եմ՝ ժողովուրդ ջան, ես պատրաստ չեմ: Ի՞նչ է նշանակում ես ծիրան մթերեմ, տանեմ ծիրանը մինուսով ծախեմ, ՊԵԿ-ը գա իմ վրա շահութահարկ գրի: Ինչի՞ համար: Մոռացեք մթերումը, մենք չենք անելու, բռնեն ըսենց ճզմեն, մենք մթերե՞նք: 6 ամիս ՊԵԿ-ը քննություն է տարել, մի հատ հարցրեք՝ խի՞ չեք կանչել մարդուն ասել՝ հարկ պիտի վճարես: Խի՞ ես վնաս տալիս մարդուն, խի՞ մեր 100 միլիոնը հարամ արեցիր»:
Ղազարյանը ՊԵԿ-ի քննչական վարչության աշխատանքը կասկածի տակ է առնում. Նրա փաստաբանները արժանահավատ չեն համարում 7 միլիարդ դրամ հարկերի թաքցնելու քննչականի մեղադրանքն ու փորձագիտական կենտրոնի՝ ՊԵԿ քննչականի մեղադրանքի հաստատումը:
Մանրամասները՝ տեսանյութում
«Ասում են, Դավիթ Ղազարյանն է կուռացիա անում, ամեն ինչ ինքն է կազմակերպում։ Ես երեկ անակնկալի եկա, երբ հարգարժան քննիչի մոտ տեսա մի մեծ սերվանդ, բաղկացած 150 մեծ պապկայից։ Դա «Սպայկա»-ի գործն էր։ Ասում եմ, բա ինչի՞ մի հատ հարցում չեք անում, բա կարող է մենք համաձայն ենք, ենթադրենք այդ ամեն ինչը վճարենք։ Մենք փախե՞լ ենք։ Մենք միշտ ձեր կողքը եղել ենք, չէ՞։ Ինձ ասում են կամ ստորագրում ես, կամ կալանավորվում ես։ Ես ՊԵԿ-ի հետապնդումն եմ տեսնում «Սպայկա»-ի նկատմամբ բառիս բուն իմաստով, ով ոնց ուզում է՝ հասկանա»:
Վերջերս «Սպայկա» ընկերության պանրի նորաստեղծ գործարանի բացմանը մասնակցում էր նաեւ վարչապետ Փաշինյանը, նույնիսկ համտեսել պանիրը:
Ղազարյանն ասաց՝ ում էլ զեկուցեին՝ 7 միլիարդ հարկ չի վճարել, ի՞նչ պիտի ասեր.«Երեկվանից ասում եմ՝ հիմա մեր վարչապետը ջղայնացած էլ կլինի, հումոր եմ անում, կներեք, կասի՝ գնացինք, բացումն արեցինք, մի կտոր պանիրը կերանք, ուզում ա 7 միլիարդը քենսըլ անի՞»:
Մանրամասները՝ տեսանյութում
Նշենք, որ գյուղացիներն ու ընկերության աշխատակիցներն այսօր բողոքի ցույց էին անում ի պաշտպանություն Ղազարյանի. Նրանք հայտարարում էին՝ փողոց կփակենք, եթե Ղազարյանին կալանավորեն ու գործարանի աշխատանքը կանգնի:
Նելլի ԲԱԲԱՅԱՆ
