Այսօր «Սպայկա» ընկերության սեփականատեր Դավիթ Ղազարյանը լրագրողների հետ հանդիպման ժամանակ հայտարարեց՝ ՊԵԿ հարուցած գործը շինծու է:
ՊԵԿ-ը հայտարարել է, որ ՊԵԿ քննչական վարչության աշխատակիցները կոռուպցիոն բնույթի հանցագործությունների բացահայտման ուղղությամբ կատարած ն միջոցառումների արդյունքում բացահայտել են առանձնապես խոշոր չափերով հարկերը չվճարելու դեպք՝ 7 միլիարդ դրամ: Ըստ ՊԵԿ-ի՝ հանրորեն վտանգավոր արարքը կատարելու համար 2019թ. ապրիլի 4-ին Դավիթ Վենգերի Ղազարյանին («Սպայկայի» տնօրեն) մեղադրանք է առաջադրվել ՀՀ քրեական օրենսգրքի 205-րդ հոդվածի 2-րդ մասով: ՊԵԿ քննչական վարչության քննիչի կողմից 04.04.2019թ-ին միջնորդություն է ներկայացվել Երեւան քաղաքի ընդհանուր իրավասության առաջին ատյանի դատարան` Դավիթ Ղազարյանի նկատմամբ կալանավորումը, որպես խափանման միջոց ընտրելու համար:
Միջնորդության քննարկումն այսօր է ժամը 17:00-ին: Ընկերության աշխատակիցներն ու գյուղացիները բողոքի ցույց էին անում ի պաշտպանություն ընկերության սեփականատիրոջ:
Կարդացեք նաև
Ղազարյանը հայտարարեց, որ երեկ երեկոյան զանգ է ստացել, որով հայտնել են՝ Եվրասիական զարգացման բանկը ժամանակավոր կասեցնում է ընկերության մոտ 100 մլն դոլարի ֆինանսավորումը, քանի որ Ղազարյանի նկատմամբ քրեական հետապնդում է հայտարարված:
Ղազարյանը միտում է նկատում ՊԵԿ գործողություններում. «Սուտ է այն տեղեկությունը, թե «Գրինպրոդուկտի» իրական սեփականատերը «Սպայկան է»:
Ըստ Ղազարյանի՝ «7 միլիարդը շինծու է, ներկայացրել են այսքան գումար, որ ժողովուրդը ՊԵԿ-ի կողքին լինի»:
Մանրամասն՝ տեսանյութում
Ղազարյանի ներկայցմամբ՝ անցյալ տարի էլ ՊԵԿ-ը 2.45 մլրդ դրամի ակտ էր կազմել.«Այս գումարի հաշվարկ տեղի չի ունեցել, ես որպես ընկերության սեփականատեր, գնացել եմ կոմպրոմիսի, քանի որ քաոս էր: համաձայնվել եմ տալ ճշգրտում ու վճարել այդ գումարը ու քրեական հետապնդումը կարճեցին»:
Մանրամասները՝ տեսանյութում
Ինչ վերաբերում է 7 միլիարդին, ապա Ղազարյանն ասաց, որ դրանից 5 միլիարդը ԱԱՀ- է, որը ենթակա է ընկերությանը հետվերադարձման. «Միայն կարող եմ հայտարարել՝ վճարող չկա Գրինպրադուկտով, չեն կարում Գրինպրոդուկտի թեման փակել, դրա համար փոխկապակցում են «Սպայկայի» հետ, որպեսզի կարողանան այդ փողը կորզեն: 7 միլիարդ են ներկայացնում հանրության աչքին՝ «7 միլիարդը կերել է, թող փակվի»: Սուտը՞, թե ես 7 միլիարդը կերել եմ»:
Մանրամասները՝ տեսանյութում
Aravot.am-ի հարցին՝ որեւէ միտում նկատո՞ւմ եք, քանի որ «Սպայկայի» անունը կապում են ՀՀ 2-րդ նախագահ Ռոբերտ Քոչարյանի ընտանիքի հետ, Սերժ Սարգսյանի փեսայի՝ Միքայել Մինասյանի անվան հետ, Ղազարյանը հիշեց թավշյա հեղափոխությունը. «Ինչ հեղափոխությունը սկսել է, ես 4 երեխա ունեմ, իմ տանը իմ փոքրիկն ասում էր՝ Նիկո՛լ, առա՛ջ: Ես ողջունել եմ, որովհետեւ եթե մեր երկրում օրենքը պետք է լինի գերակա, ես մտածել եմ իմ երեխաների համար, որովհետեւ, ես մտածել եմ՝ իմ էրեխեն կարող ա Դավիթի (նկատի ունի ինքն իրեն Ն.Բ.) պես «շուստրիյ» չլինի: Ես դա ուզել եմ, որովհետեւ տղաս դաշնակահար է, քաղաքականության մեջ չեմ եղել ու չեմ ուզում քաղաքականացնել, թիվ են ասել, ու մնացել են տակը»:
Մանրամասները՝ տեսանյութում
Դավիթ Ղազարյանը վստահեցրեց՝ «Սպայկա» ընկերության սեփականատերն ինքն է, մի ժամանակ Ռոզա Ստեփանյանն էլ մասնաբաժին է ունեցել: Ղազարյանը՝ «Սպայկայի», Քոչարյանների եւ Միքայել Մինասյանի ընտանիքների եւ Ռոզա Ստեփանյանի միջեւ կապի մասին ասաց՝ «Քոչարյանի հետ կապ տեղի չի ունեցել: Միքայել Մինասյանին անձամբ ես ճանաչում եմ, բայց մենք չունենք գործնական հարաբերություններ»:
Մանրամասն՝ տեսանյութում
Ղազարյանը վստահեցնում է՝ «Ես արդար եմ, չի ստացվի»:
Մեր հարցին՝ ըստ ՊԵԿ-ի, «Գրինպրադուկտը», որը կապակցում են «Սպայկայի» հետ, 2015-2016 թվականներին որոշակի խմբաքանակ ապրանքների ներմուծման ժամանակ ներկայացրել է որպես մաքսազերծման ոչ ենթակա ապրանքներ, մինչդեռ այդ նույն ապրանքները Վրաստանում մաքսազերծել է իրական անուններով՝ կաղամբ, տանձ, խնձոր եւ այլն, Ղազարյանը պատասխանեց՝ «Մենք կատարել ենք այլ ընկերության հանձնարարություն»:
Մեր Ճշտող հարցին՝ չգիտեի՞ք ինչ ապրանք է, եւ հանձնարարությո՞ւն եք արել, Ղազարյանը վստահեցրեց՝ «Մեզ հետաքրքիր էլ չէ, մենք եկամուտ հետապնդող ընկերություն ենք, եկամուտ ստացել ենք, հարկը տվել ենք: Ես չգիտեմ… սա ՊԵԿ-ի շոուն է, ի՞նչ է»:
Ղազարյանը նաեւ ասաց, որ «Գրինպրադուկտի» հիմնադիրը նախկինում «Սպայկա» ընկերությունում է աշխատել, դուրս է եկել ու հիմնադրել այդ ընկերությունը:
Նելլի ԲԱԲԱՅԱՆ
