«Իշխանության երկու թեւերում՝ օրենսդիրում եւ գործադիրում տեղի ունեցած փոփոխություններն ակնհայտ են, ինչը չենք կարող ասել դատական իշխանության մասով: Կար կարծրացած ընկալում, որ եթե գործադիրից կամ օրենսդիրից դատավորներին այլեւս չեն զանգում, հրահանգներ չեն տալիս, դատավորների անկախությունը երաշխավորվելու է, որն էլ իր հերթին կբերի համակարգի առողջացմանը»,- այսօր մարդու իրավունքների մասին ԱԺ լսումների ժամանակ ասաց «Լուսավոր Հայաստան» խմբակցության պատգամավոր Անի Սամսոնյանը:
Ըստ նրա վերջին շրջանում դատավորները թիրախավորվել են հանրության կողմից, որը դրսեւորվել է տարբեր ձեւով՝ վիրավորանքներով, տարատեսակ ճնշումներով, ընդհուպ մինչեւ սպառնալիքներով: Սամսոնյանը խոսեց սոցցանցերում եւ մեդիա հարթակներում ատելության խոսքի մասին. «Ստացվում է, որ տարիներ շարունակ հանրությունը, որը բողոքել է իշխանություններից դատավորների կախյալ վիճակից ու կողմնակալությունից, ներկայումս արդեն ինքն է հախուհաշիվ պահանջում դատավորներից ու պահանջում իր ցանկությամբ որոշումներ կայացնել: Ըստ պատգամավորի, այս միտումը վտանգավոր է. «Ի՞նչ տարբերություն, թե ով է արտաքին միջամտության սուբյեկտը՝ պաշոնյա՞ն, թե՞ քաղաքացին, ինքնին որեւէ միջամտություն վնասում է արդարադատության իրականացմանը, դատավորների անկախությանը եւ ի վերջո դատական իշխանության՝ որպես ինստիտուտ կայացմանը»:
Անի Սամսոնյանը գտնում է, որ եթե կամք կա դատական համակարգում բարեփոխումներ անել, պետությունը պետք է կարողանա պաշտպանել դատավորի հեղինակությունն ու անկախությունը, որը չպետք է խոչընդոտվի փողոց փակելով. «Մի քանի դատավորների բացասական օրինակով պետք չէ վարկաբեկել բոլորին»:
Կարդացեք նաև
Հռիփսիմե ՋԵԲԵՋՅԱՆ
