Մոսկվան Բաքվին ու Երևանին անհրաժեշտ աջակցություն կցուցաբերի Վիեննայում Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիև միջև տեղի ունեցած հանդիպման արդյունքներն իրականացնելու գործում: Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան ադրբեջանական ՕՆԱ գործակալությանը տված հարցազրույցում: Հարցազրույցի տեքստը տեղադրված է գերատեսչության կայքում:
«Ռուսաստանի արտաքին քաղաքականության հայեցակարգում Լեռնային Ղարաբաղի կարգավորման գործում կողմերին աջակցության ցուցաբերումը դասվում է կարևոր արտաքին քաղաքական առաջնահերթությունների շարքում: Այդ հանգամանքը կարևոր նշանակություն է տալիս իրականացվող միջնորդական գործունեությանը, սահմանում է մեծ ուշադրություն դրա արդյունքների նկատմամբ,- ասել է Զախարովան:- Աշխատում ենք ԵԱՀԿ Մինսկի խմբի մյուս համանախագահ-երկրների (ԱՄՆ, Ֆրանսիա) հետ սերտ գործակցությամբ»:
Այդ համատեքստում անդրադառնալով Հայաստանում քաղաքական ղեկավարության փոփոխությանը՝ Զախարովան նշել է, որ դա «Հայաստանի ներքին գործն է»: «Լեռնային Ղարաբաղի հիմնահարցի շուրջ բանակցային գործընթացը շարունակվում է: Կողմերը տրամադրվածություն են ցուցաբերում շարունակել աշխատանքը՝ ուղղված խաղաղ կարգավորման ձեռքբերմանը»,- ասել է նա:
Զախարովայի խոսքով՝ այդ տրամադրվածությունը գրանցվել է նաև Վիեննայում անցյալ շաբաթ Փաշինյանի և Ալիևի հանդիպումից հետո արված հայտարարություններում: «Ողջունում ենք կառուցողական մոտեցումը, որը եղել է բանակցություններում: Կողմերին կցուցաբերենք անհրաժեշտ աջակցություն՝ կյանքի կոչելու այն գաղափարները, որոնց հիման վրա փոխըմբռնման են հասել Ավստրիայի մայրաքաղաքում»,- ասել է դիվանագետը:
Կարդացեք նաև
«Այնուամենայնիվ, ինչպես բազմիցս ընդգծել են համանախագահ-երկրների նախագահները հակամարտությանը վերջ տալու պատասխանատվությունն ընկած է դրանում ներգրավված կողմերի վրա,- ասել է Զախարովան: Դրա համար հիմքեր առկա են: Գլխավորը՝ ցուցաբերել քաղաքական կամք»:
Պատրաստեց՝ Վիկտորյա ԱՆԴՐԵԱՍՅԱՆԸ
