Հայաստանի թաեքվոնդոյի ֆեդերացիան անցած տարվա աշնանից նախագահ չունի: Ֆեդերացիան բաժանված է երկու ճամբարի, որոնցից յուրաքանչյուրը նախագահի իր թեկնածուն ունի: Ներկայիս ղեկավարությունն առաջադրում է Դավիթ Պողոսյանի թեկնածությունը, դժգոհողների թեւը ցանկանում է տեսնել Ահարոն Պապոյանին: Երկուսն էլ նախկին թաեքվոնդոիստ են, երկուսն էլ ներկայումս զբաղվում են գործարարությամբ:
Այսօր Հայաստանի առաջնությանը ներկա էր թեկնածուներից Դավիթ Պողոսյանը: Նա սիրով համաձայնեց զրուցել Aravot.am-ի հետ:
–Ինչպես եղավ, որ որոշեցիք առաջադրվել որպես Հայաստանի թաեքվոնդոյի ֆեդերացիայի նախագահի թեկնածու:
-Երկար տարիներ Վոլգոգրադում զբաղվել եմ թաեքվոնդոյով՝ ունեմ կանաչ գոտի: Առաջարկ ստացել եմ Վարդան Ղահրամանյանից եւ Գեւորգ Դանիելյանից: Եվ քանի որ ցանկանում եմ, որ իմ մարզաձեւը զարգանա Հայաստանում, երկար մտածելով հասկացա, որ կարող եմ իմ ներդրումն ունենալ: Այս անորոշ վիճակից տուժում եմ մարզաձեւն ու մարզիկները:
Կարդացեք նաև
–Ո՞րն է լինելու ձեր ներդրումը:
-Ծրագրերը, դրանց ֆինանսավորումը եւ աստիճանական իրականացումը: Շեշտը դրվելու է մասսայականացման վրա, իսկ դրա համար նոր պայմաններ ու գույք է հարկավոր լինելու: Առաջնային անելիքներից մեկը համարում եմ թաեքվոնդոյի համար հիմնական մարզադահլիճ ունենալը, ինչն այս պահին չկա: Շատ եմ կարեւորում մարզիչների որակավորումը բարձրացնելը: Դրա համար նրանք պետք է ներգրավվեն միջազգային տարբեր ֆորումներում, մասնակցեն ծրագրերի: Անպայման հարկավոր է շատացնել հավաքների քանակը, ընդլայնել դրանց աշխարհագրությունը:
–Այդ ամենը կապված է ֆինանսների հետ:
-Անշուշտ, դա ներդրումներ է պահանջում եւ դրանց ճիշտ կառավարում: Այսինքն, ներդրումներն էլ պետք է ճիշտ կատարել:
–Դժգոհող ճամբարն իր թեկնածուն ունի եւ վստահեցնում է, որ նա պատրաստ է ներդնել այնքան գումար, որքան ֆեդերացիային կտրամադրի պետությունը: Դուք այդպիսի քայլի պատրա՞ստ եք:
-Ես պատրաստ եմ ներդնել այնքան գումար, որքանի կարիքը կա խելամիտ ծրագրեր իրականացնելու համար: Իմ ծրագրերը հստակ բաշխված են ըստ տարիների: Կոնկրետ թվեր չէի ցանկանա նշել, սակայն դա կարող է լինել տարեկան շուրջ 5 մլն դրամ:
-Պատրա՞ստ եք միավորել ֆեդերացիան, վերացնել ճամբարների միջեւ բաժանարար գծերը եւ աշխատել բոլորի հետ:
-Ես այդպիսի քայլեր արդեն նախաձեռնել եմ՝ բոլորին առաջարկելով հանդիպել, զրուցել, միասին հասկանալ խնդիրները, գտնել լուծումներ եւ շարժվել առաջ: Թաեքվոնդոյում յուրայիններ ու ոչ յուրայիններ չկան: Դա լավ տեղ չի տանի: Վստահ եմ՝ բոլորն էլ սրտացավ են: Յուրաքանչյուր մարզիչ, մասնագետ կարող է լավ ու ճիշտ խորհուրդ տալ:
-Իսկ եթե դուք չընտրվեք…
-Կշնորհավորեմ նոր ընտրված նախագահին:
Աշոտ ՀԱԿՈԲՅԱՆ
