Նախորդ տարվա համեմատ Հայաստանում բանտարկությունների թիվը նվազել է 8.7%-ով: Այս մասին ասվում է Եվրոպայի խորհրդի ամենամյա քրեական վիճակագրություն (SPACE) 2018 զեկույցում, որը ներառում է 2016-ից մինչև 2018թ. ընկած ժամանակաշրջանի տվյալները:
Հայաստանից բացի, բանտարկությունների նվազում է գրանցվել Ռումինիայում, Բուլղարիայում, Նորվեգիայում, Ֆինլանդիայում, Հյուսիսային Մակեդոնիայում, Լատվիայում, Լյուքսեմբուրգում, Էստոնիայում և Կիպրոսում: Ընդհակառակը, բանտարկությունների աճ գրանցվել է Իսլանդիայում, Իտալիայում, Նիդերլանդներում, Դանիայում և Մոնտենեգրոյում:
Զեկույցում նշվում է, որ, ընդհանուր առմամբ Եվրոպայում կալանքի ենթարկվածները կազմում են ընդհանուր բանտարկվածների 22.4%-ը: Ընդ որում, Հայաստանը դասվել է կալանավորվածների ամենաբարձր ցուցանիշ ունեցող երկրների շարքում՝ 36.7%:
Ամենամեծ թվով կալանավորված անձիք ու դատապարտյալներ ունեցող երկիրը Ռուսաստանն է, նրան հաջորդում են Մեծ Բրիտանիան, Լեհաստանը, Ֆրանսիան և Գերմանիան: Նշվում է, որ Հայաստանում այդ թիվը կրճատվել է 9.5%-ով:
Կարդացեք նաև
Հայաստանում քրեակատարողական հիմնարկների լրակազմը 5,351 է, որի արդյունքում բանտային գերբեռնվածության ցուցանիշը 66.1 է, ինչը զգալիորեն ցածր է Եվրոպայում միջին ցուցանիշից: Ավելին, գերբեռնվածությունը 2016թ. 72.0-ից կրճատվել է 66.1-ի (2017թ): Մեկ խցում պահվող բանտարկյալների թիվը 2016թ. 4.9-ից 2017թ. կրճատվել է մինչև 3.6:
Կին կալանավորվածների և դատապարտյալների թիվը 125 է, ինչը կազմում է ընդհանուրի 3.5% և եվրոպական միջին ցուցանիշից (5.0) ցածր է:
2017թ. քրեակատարողական ծառայությունների վարչակազմի համար ամենամեծ բյուջե հատկացրած երկիրը Ռուսաստանն է (3.9 մլրդ եվրո), նրան հաջորդում են Գերմանիան, Իտալիան, Ֆրանսիան, Իսպանիան: Հայաստանը 2017թ. քրեակատարողական ծառայությունների վարչակազմի վրա ծախսել է 15.2 մլն եվրո, ինչը 2016թ. համեմատությամբ գրեթե չի փոխվել:
Հայաստանում դատապարտյալների զգալի մասը (42.2%) ազատազրկված է 5-10 տարի ժամկետով: 2016թ. համեմատությամբ այդ ցուցանիշը չի փոխվել:
Պատրաստեց՝ Վիկտորյա ԱՆԴՐԵԱՍՅԱՆԸ
