Երևանի ընդհանուր իրավասության դատարանն այսօր մերժել է ավելի վաղ «Իրավունքների պաշտպանություն առանց սահմանների» հ/կ-ի ներկայացրած բողոքը, որը, հիշեցնենք, ուղղված էր 2016թ.-ի հուլիսի 29-ին Սարի թաղում տուժած անձանց վերաբերյալ ՀՀ հատուկ քննչական ծառայությունում հարուցված քրեական գործի վարույթը կասեցնելու որոշման և այդ առնչությամբ հ/կ-ի բողոքը մերժելու մասին ՀՀ գլխավոր դատախազության կայացրած որոշումների դեմ:
Հիշեցնենք, որ Սարի թաղում հուլիսի 29-ի բազմամարդ բողոքի երթի ժամանակ Ոստիկանությունը հատուկ միջոցներ էր կիրառել, տուժել էին տասնյակ քաղաքացիներ եւ լրագրողներ: «Իրավունքների պաշտպանություն առանց սահմանների» հ/կ ղեկավար, փաստաբան Հայկուհի Հարությունյանն Aravot.am-ի հետ զրույցում նշեց, որ դատարանի մերժման որոշումը դեռ չեն ստացել, ուստի իրավական գնահատականներ հնչեցնել այս պահին չի կարող, բայց դատարանի որոշումը բողոքարկելու են վերաքննիչ ատյանում:
Լուիզա ՍՈՒՔԻԱՍՅԱՆ
