ՀՀ երրորդ նախագահ, ՀՀԿ նախագահ Սերժ Սարգսյանն այսօր Եռաբլուր էր այցելել: Նա ծաղիկ դրեց սպարապետ Վազգեն Սարգսյանի, Զորավար Անդրանիկի շիրիմներին, հետո ապրիլյան հերոսների շիրիմներին մի-մի փունջ ծաղիկ դրեց ու խոնարհվեց:
Սերժ Սարգսյանին լրագրողները բազմաթիվ հարցեր ուղղեցին՝ Դավիթ Տոնոյանի հայտարարության, ներկայիս բանակցային գործընթացի, ապրիլյան պատերազմի որոշ հանգամանքների ուսումնասիրության, ներքաղաքական անցուդարձի վերաբերյալ, բայց նա անդրդվելի էր, չէր պատասխանում:
ՀՀԿ փոխնախագահ Արմեն Աշոտյանը, տեսնելով, որ չնայած Սերժ Սարգսյանի լռությանը, լրագրողները համառորեն շարունակում են հնչեցնել իրենց հարցերը, արձագանքեց, որ «հարգելի լրագրողներ, ձեր բոլոր հարցերին ես պարոն Սարգսյանին ճանապարհելուց հետո կպատասխանեմ»:
Լրագրողները հիշեցրին Աշոտյանին, որ ասում էր՝ «ես Սերժ Սարգսյանի հետ մտերիմ եմ, բայց իրավասու չեմ պարոն Սարգսյանի անունից խոսելու»: Սերժ Սարգսյանը հազիվ էր զսպում ծիծաղը:
Կարդացեք նաև
Աշոտյանն արձագանքեց, որ ինքը Սերժ Սարգսյանի անունից չի խոսելու, այլ նրա թույլտվությամբ: Իսկ թե ինքը՝ երրորդ նախագահը ե՞րբ է խոսելու, արդյոք այս մոտ մեկ տարվա լռությունը բավարար չէ՞ր, պարզվեց՝ մոտ ժամանակներս պատրաստվում է ասուլիս հրավիրել:
Հարցին՝ ե՞րբ եք խոսելու՝ Սերժ Սարգսյանը պատասխանեց. «Երբ ժամանակը գա»:
Լրագրողները հարցրեցին՝ քաղաքացիները ձեր հրաժարականի օրը որպես տոն են նշելու, ի վերջո ձեզ հետաքրքիր չէ՞ ինչու հարյուր հազարավոր քաղաքացիներ ձեզ մերժեցին՝ Սերժ Սարգսյանը շրջվեց եւ հետաքրքրվեց՝ իսկ ո՞վ է այդ ձայնով խոսողը:
Հռիփսիմե ՋԵԲԵՋՅԱՆ
