«Մենք համագումարի գնալու ենք մեկ միասնական թեկնածուով. նա Սասուն Միքայելյանն է»,- Aravot.am-ի հետ զրույցում տեղեկացրեց Երկրապահ կամավորական միության (ԵԿՄ) վարչության փոխնախագահ Արա Կետիկյանը:
Նշենք, որ այսօր տեղի ունեցավ ԵԿՄ վարչության փակ նիստ: Արա Կետիկյանին խնդրեցինք նիստից մանրամասներ հաղորդել: Նա տեղեկացրեց. «Փակ նիստի ընթացքում որոշվեց ԵԿՄ 12-րդ արտահերթ համագումարի օրը, տեղը, ժամն ու օրակարգը: Համագումարը տեղի կունենա ապրիլի 7-ին՝ ժամը 12.00-ին, ՀՀ Կառավարության նիստերի դահլիճում: Տեղում Սասուն Միքայելյանը կառաջադրվի համագումարի պատվիրակների և վարչության անդամների կողմից: Կընտրենք նաև վարչություն, որն էլ կընտրի նախագահ»:
ԵԿՄ փոխնախագահը հայտնեց՝ այսօրվա փակ նիստին քննարկվել են նաև մի քանի հարյուր տղաների՝ ԵԿՄ վերադարձի դիմումներ, մի շարք տեխնիկական հարցեր:
Մեր հարցին՝ հնարավո՞ր է վարչության անդամների թիվը կրճատվի, Արա Կետիկյանը պատասխանեց. «Սասուն Միքայելյանն իր առաջարկություններն ունի, որոնց մասին համագումարի ժամանակ կհայտնի»:
Տաթև ՀԱՐՈՒԹՅՈՒՆՅԱՆ
