Ապրիլի 1-ի առավոտյան մշակութային գործիչները հավաքվել էին Կառավարության շենքի դիմաց՝ իրենց բողոքի ձայնը բարձրացնելու Օպերային թատրոնի նոր տնօրենի նշանակման դեմ։ Նրանց մի մասին ընդունել էր ՀՀ վարչապետ Նիկոլ Փաշինյանը: Այդ արվեստագետների թվում էր Ալ. Սպենդիարյանի անվան օպերայի եւ բալետի ազգային ակադեմիական թատրոնի երիտասարդական ծրագրի ղեկավար Լեւոն Ջավադյանը:
«Առավոտը» պարոն Ջավադյանից հետաքրքրվեց՝ իր կարծիքով ինչո՞ւ է հենց Կոնստանտին Օրբելյանը թիրախավորվել: «Կա անձնավորված կողմնապահություն մշակույթի նախարարի պաշտոնակատար Նազենի Ղարիբյանի կողմից: Տիկին Ղարիբյանը ներկայացնում է ոչ թե մշակույթի գործիչների, այլ մի խումբ մարդկանց շահերը: Վարչապետն ասաց, որ բողոքների հիման վրա է հանձնաժողով ստեղծվել, իսկ ամենակարեւոր բողոքը եղել է մեր նախկին աշխատակից Քրիստինե Նաղդալյանինը, որի ամուսինը` Արտակ Գրիգորյանը, տեղակալն է մշակույթի նախարարի աշխատակազմի ղեկավարի, ում ուղիղ համակարգման տակ մշակույթի նախարարության իրավաբանական վարչությունն է»,- հայտնեց Լեւոն Ջավադյանը:
Նաեւ տարակուսանք հայտնեց. «Եթե պարոն Օրբելյանը խախտումով նշանակված է եղել, ինչու օպերայի իրավաբանական բաժնի պետ Քրիստինե Նաղդալյանը քայլեր չի ձեռնարկել այդ ժամանակ, եւ ոչ թե բողոքարկել է իր աշխատանքից հեռացվելու պահը, այլ Օրբելյանի նշանակումը»:
Զրույցի վերջում Լեւոն Ջավադյանը հավելեց. «Մենք ճիշտ ենք, հուսով ենք, որ հեղափոխության արդյունքում ձեւավորված նոր կառավարությունը մեր շահերն է պաշտպանելու»:
Կարդացեք նաև
ԳՈՀԱՐ ՀԱԿՈԲՅԱՆ
«Առավոտ» օրաթերթ
02.04.2019
