Ալ. Սպենդիարյանի անվան օպերայի եւ բալետի ազգային ակադեմիական թատրոնի երիտասարդական ծրագրի ղեկավար Լեւոն Ջավադյանն «Առավոտի» հետ զրույցում ասաց, որ ի պաշտպանություն Կոնստանտին Օրբելյանի՝ հավաքվել է ավելի քան 3600 ստորագրություն, այդ թվում` հայտնի անունների, ինչպես Հայաստանից, այնպես էլ արտասահմանից: Պարոն Ջավադյանի խոսքով, ինչպես Նիկոլ Փաշինյանը զուտ ՀՀ վարչապետ չէ, այլ աշխարհասփյուռ հայության համար առաջնորդ, այնպես էլ Ազգային օպերային թատրոնը զուտ ՊՈԱԿ չէ, այն ողջ հայության միակ օպերային թատրոնն է:
Լեւոն Ջավադյանը նշեց, որ տպավորված է Նիկոլ Փաշինյանի հետ հանդիպումից, որն ասել է, թե կան փաստեր, որոնք իրեն են ներկայացվել: «Վարչապետն ասել է, որ եթե ներկայացված փաստերը ճիշտ են, ուրեմն կշարժվեն օրենքով, իսկ եթե դրանց մեջ գոնե մեկը չի համապատասխանում իրականությանը, ապա փաստեր ներկայացնողը կպատժվի եւ կհեռացվի աշխատանքից, իսկ մնացած բոլոր փաստերը կասկածի տակ կառնվեն»,- ասաց մեր զրուցակիցը:
Լեւոն Ջավադյանի խոսքերով, իրենք ունեն բոլոր փաստերը (նախարարությունը.-Գ. Հ.), թե ինչու Կոնստանտին Օրբելյանը չի կարող լինել տնօրեն, քանի որ, ըստ այդ փաստերի, իբր խախտումներ է արել, միլիոններ են վատնվել: «Մենք այդ փաստերը կարող ենք ամբողջությամբ ժխտել, հիմա զբաղվում ենք դրանով, որ գրավոր ներկայացվի վարչապետին»,-ընդգծեց նա:
ԳՈՀԱՐ ՀԱԿՈԲՅԱՆ
Կարդացեք նաև
«Առավոտ» օրաթերթ
2-ը ապրիլի 2019 թ
