Այսօր երեկոյան Իրանի Լոռեստան նահանգում տեղացել է վերջին վաթսուն տարվա ընթացքում իր նախընթացը չունեցող հորդառատ անձրև: Փակվել է մարզկենտրոն՝ Խոռամաբադի օդանավակայանի վազքուղին, իսկ Փոլ Դոխտար քաղաքի հիմնական մասը թաղվել է ջրի տակ: Բնակիչները բարձրացել են իրենց տների տանիքների վրա կամ ապաստանել են շրջակա բարձրունքները: Քաղաքն ունի 32,000 շունչ բնակչություն և գտնվում է ծովի մակերևույթից 700 մետր բարձրության վրա:
Աղետի վայր են ժամանել Իրանի տրանսպորտի նախարարը և բանակի ցամաքային ուժերի հրամանատարը. Տարածք են բերվել մարդատար զրահապատ մեքենա տուժածներին փրկելու համար, իսկ եղանակային աննպաստ պայմանների պատճառով ուղղաթիռներն առայժմ չեն կարողանում օդ բարձրանալ: Քաղաքի հետ խզված է հեռախոսային կապը, ավերվել են հարյուրավոր տներ, ճանապարհներ ու կամուրջներ, նաև Սասանյան դինաստիայի շրջանի երկուհազարամյա պատմական հուշարձաններ:
Աննախընթաց տեղումները շարունակվելու են ևս քանի օր, վտանգված են մի շարք ջրամբարներ և հավանական վտանգներից խուսափելու համար կառավարության որոշումով ջրամբարներից մի մասի փականները բացվել են:
Վաղը Նովռուզի երկշաբաթյա արձակուրդի վերջին օրն է և իրանցիները սովորաբար այդ օրն անց են կացնում բնության գրկում. կառավարությունը ժողովրդին խնդրել է իրենց տներից չհեռանան:
Կարդացեք նաև
Տիգրան Դավթյան
