Առողջապահության փոխնախարարը կաշառք ստանալու մեղադրանքով ձերբակալվել է, դրան զուգահետ վարչապետը բազմիցս հայտարարել է, որ երկրում կոռուպցիան արմատախիլ է արվել, համակարգային կոռուպցիա չկա:
Այսօր ԱԺ ճեպարույցի ժամանակ այս առնչությամբ հարցին ի պատասխան՝ «Իմ քայլը» խմբակցության պատգամավոր Ռուբեն Ռուբինյանը պատասխանեց. «Համակարգային կոռուպցիայի բացակայությունը լինում է այն ժամանակ, երբ չեն լինում անպատժելի գործողություններ: Հենց այն փաստը, որ ձերբակալվում են պետական պաշտոնյաներ, նշանակում է կոռուպցիան համակարգային չէ: Միեւնույն ժամանակ ոչ մի կերպ պատասխանատվություն չեմ վերցնում ինձ վրա ասելու, որ այդ մարդիկ մեղավոր են, քանի դեռ մեղքը ապացուցված չէ»:
Members of ‘My Step’ faction Andranik Kocharyan and Ruben Rubinyan hold parliamentary briefings at the RA NA
Անդրանիկ Քոչարյանը պատասխանեց. «Պետք է ուրախանանք, որ հետեւողական պայքար է գնում, եւ արտոնյալ որեւէ մեկը չկա: Նախկինում նրանք ունեին չգրված լիցենզիաներ՝ ապօրինություններով հարստանալու: Այսօր, երբ ասում են՝ համակարգային խնդիր գոյութուն չունի, դա նշանակում է, որ իշխանական բուրգում վերեւից սկսած կա քաղաքական պատվեր՝ կոռուպցիայի դեմ լայնամասշտաբ գործողութուններ անելու: Դա կլինի տարբեր մարմինների կողմից, ուժային մարմինների: Դա կլինի թե՛ Դավիթ Անանյանի կառույցի, թե՛ իրավապահ համակարգում ընդգրկված մյուս կառույցների, դուք կտեսնեք հետեւողական պայքար: Եթե երեկ ձերբակալվել է նոր նշանակվածը, նշանակում է, որ տաբուներ գոյություն չունեն»:
Հռիփսիմե ՋԵԲԵՋՅԱՆ
